విపత్తులపై ముందస్తు హెచ్చరికలు
Early warnings of disasters
- ప్రాణ, ఆస్తినష్టాల తగ్గింపు
- నేషనల్ జియోసైన్స్ అవార్డు’ల్లో రాష్ర్టపతి ద్రౌపదీ ముర్మూ పిలుపు
- భవిష్యత్ తరాలకు ప్రేరణ జియో సైన్స్: కేంద్రమంత్రి జి.కిషన్ రెడ్డి
నా తెలంగాణ, న్యూ ఢిల్లీ: విపత్తులు, ప్రకృతి వైపరీత్యాల వల్ల ఆస్తి, ప్రాణనష్టాలను తగ్గించేందుకు శాస్ర్తవేత్తలు మరింత ఆధునికతతో పనిచేయాల్సిన అవసరం ఉందని రాష్ర్టపతి ద్రౌపదీ ముర్మూ అభిప్రాయం వ్యక్తం చేశారు. మంగళవారం న్యూ ఢిల్లీలోని రాష్ర్టపతి భవన్ లో ‘నేషనల్ జియోసైన్స్ అవార్డు’లను 21 మందికి రాష్ర్టపతి ముర్మూ ప్రదానం చేశారు.
ఈ సందర్భంగా రాష్ర్టపతి మాట్లాడుతూ.. దేశంలోని అనేక కొండ, అటవీ ప్రాంతాల్లో ప్రకృతి వైపరీత్యాలపై రాష్ట్రాలకు ముందస్తు హెచ్చరికలు జారీ చేసేందుకు కోల్‌కతాలో నేషనల్ ల్యాండ్‌స్లైడ్ ఫోర్‌కాస్టింగ్ సెంటర్‌ను ఏర్పాటు చేస్తున్నట్లు ఆమె తెలిపారు. ఈ వైపరీతయాలలో ప్రాణనష్టాన్ని తగ్గించేందుకు ఫూల్‌ప్రూఫ్ ఫోర్‌కాస్టింగ్ సిస్టమ్‌ను రూపొందించాలని రాష్ట్రపతి శాస్ర్తవేత్తలకు పిలుపునిచ్చారు.
2047 నాటికి ఖనిజ రంగం దేశాభివృద్ధిలో కీలకభూమిక పోషించనుందని తెలిపారు. ఈ రంగం అనేక సంస్కరణలు, ఆవిష్కరణల దిశగా ఆర్థికాభివృద్ధిని సాధిస్తుందని తెలిపారు. అదే సమయంలో పర్యావరణ పరిరక్షణకు కూడా చర్యలు తీసుకోవడం సంతోషకరమని రాష్ర్టపతి తెలిపారు.
12 కేటగిరిల్లోని 21 మంది శాస్ర్తవేత్తలకు రాష్ర్టపతి ముర్మూ జియోసైన్స్ అవార్డులను అందజేశారు.
సాంకేతికత దిశగా గనుల శాఖ: కేంద్రమంత్రి జి.కిషన్ రెడ్డి..
కేంద్ర గనుల శాఖ ఆధునిక సాంకేతికత దిశగా సాగుతోందని తెలంగాణ రాష్ర్ట బీజేపీ అధ్యక్షుడు, కేంద్ర బొగ్గు, గనుల శాఖ మంత్రి జి.కిషన్ రెడ్డి అన్నారు. గనుల శాఖ ఆధ్వర్యంలో ఏర్పాటైన ఈ అవార్డుల కార్యక్రమంలో కేంద్రమంత్రి జి.కిషన్ రెడ్డి పాల్గొని ప్రసంగించారు.
గనుల పరిశ్రమ శాఖలో శాస్ర్తవేత్తల పాత్ర కీలకమైందని ప్రశంసించారు. మోదీ వికసిత్ భారత్ లక్ష్యాన్ని గనుల శాఖ సాధించడంలో కీలకపాత్ర వహిస్తుందన్నారు. ఏఐ, మిషన్ లెర్నింగ్, డ్రోన్ లాంటి అత్యాధునిక సాంకేతికతను వాడి ఈ శాఖలో మరింత అభివృద్ధిని సాధిస్తామన్నారు. జియో సైన్స్ భవిష్యత్ తరాలకు ఒక ప్రేరణగా నిలవనుందని కేంద్ర మంత్రి జి.కిషన్ రెడ్డి తెలిపారు. మైనింగ్ క్షేత్రంలో ప్రపంచదేశాల్లో ముందువరుసలో ఉండేందుకు నిబద్ధతతో పనిచేస్తున్నామని మంత్రి తెలిపారు. మైనింగ్ శాఖ వృద్ధికి తీసుకోవాల్సిన అన్ని చర్యలను తీసుకుంటూనే మోదీ వికసిత్ భారత్ లో కీలకంగా మారనున్నామని కేంద్రమంత్రి జి.కిషన్ రెడ్డి స్పష్టం చేశారు.
