దళితులపై దాడులు పార్లమెంట్​ లో కాంగ్రెస్​, ఎస్పీ లేవనెత్తరేం

లక్నో: బంగ్లాదేశ్​ లో దళితులపై జరుగుతున్న దాడులు, అఘాయిత్యాలపై కాంగ్రెస్​, సమాజ్​ వాదీ పార్టీ ఎందుకు మౌనంగా ఉందని, ముస్లిం ఓట్ల కోసం ఈ పార్టీలు అర్రులు చాస్తున్నాయని బీఎస్పీ అధినేత్రి మాయావతి మండిపడ్డారు. శనివారం లక్నోలో మీడియాతో మాయావతి మాట్లాడారు. పార్లమెంట్​ లో ప్రతిపక్షం జాతీయ, ప్రజా ప్రయోజనాలు లేవనెత్తకుండా తమ స్వప్రయోజనాల కోసం సంభాల్​ హింసాకాండను లేవనెత్తుతూ తప్పించుకుంటుందన్నారు. ముస్లిం ఓట్ల కోసం ఈ పార్టీలు కుటీల యత్నానికి తెరతీశాయని ఆగ్రహం వ్యక్తం చేశారు. ఈ విషయంలో ముస్లిం సమాజం కూడా జాగ్రత్తగా ఉండాల్సిన అవసరం ఎంతైనా ఉందన్నారు. దళిత వర్గాల ఎంపీలు పార్లమెంట్​ లో మౌనం వహించడం మంచిది కాదన్నారు. బంగ్లాదేశ్​ లో అన్ని వర్గాలు, హిందూ ప్రజలు అఘాయిత్యాలకు, దాడులకు గురవుతున్నారని అన్నారు. మెజార్టీగా దళితులే అందులో ఉన్నారని తెలిపారు. బాబా సాహెబ్ బెంగాల్‌లోని జైసోర్-ఖుల్నా ప్రాంతం నుంచి రాజ్యాంగ పరిషత్‌కు ఎన్నికైనప్పుడు, అది హిందూ మెజారిటీ ప్రాంతంగా ఉందన్నారు. అయినా కుటీలనీతి పార్టీల వల్ల కులతత్వ ఆటలతో ఆ ప్రాంత ప్రజల మనోభావాలతో చెలగాటం ఆడారని మండిపడ్డారు. బంగ్లాలో దళితులు దోపిడీ, దాడులకు గురవుతున్నా కాంగ్రెస్​, ఎస్పీ పార్టీల మౌనంపై మాయావతి మండిపడ్డారు.