బాలీవుడ్​ లో కలకలం.. సైఫ్​ పై దాడి

ఆరుచోట్ల కత్తిపోట్లు
రెండుచోట్ల లోతైన గాయాలు
సర్జరీ చేసిన వైద్యులు
తప్పిన ప్రాణాపాయం
దాడిని ఖండించిన సినీ ప్రముఖులు
వివిధ కోణాల్లో ముంబాయి పోలీసుల విచారణ

ముంబాయి: ప్రముఖ నటుడు సైఫ్​ అలీఖాన్​ పై దాడి బాలీవుడ్​ లో కలకలం రేకెత్తించింది. బుధవారం అర్థరాత్రి ముంబాయి బాంద్రాలోని ఆయన నివాసంలో 2 గంటల సమయంలో ఏదో అలికిడి కాగా సైఫ్​ ఇంట్లోని సహాయకుడు నిద్దురలేచాడు. అతనిపై నిందితుడి దాడి చేసి తప్పించుకునే క్రమంలో సైఫ్​ కూడా నిందితుడిని పట్టుకునేందుకు ప్రయత్నించాడు. దీంతో నిందితుడు ఒక్కసారిగా సైఫ్​ పై కత్తితో దాడికి పాల్పడ్డాడు. దీంతో సైఫ్​ అలీఖాన్​ కు ఆరుచోట్ల కత్తిపోట్ల గాయాలయ్యాయి. మెడ, వెన్నెముక ప్రాంతాల్లో లోతైన గాయాలయ్యాయి. దాడిచేసిన వెంటనే నిందితుడు పరారయ్యాడు.  ఈ దాడిలో ఇంట్లో పనిచేస్తున్న ఓ సహాకుడికి కూడా గాయాలయ్యాయి. వెంటనే సైఫ్​ ను ముంబాయిలోని లీలావతి ఆసుపత్రికి తరలించారు. వైద్యులు సైఫ్​ కు చికిత్స అందజేశారు. గురువారం వెన్నెముక ప్రాంతంలో న్యూరోసర్జన్లు డాక్టర్​ నితిన్​ డాంగే, కాస్మెటిక్​ సర్జన్​ డాక్టర్​ లీనా జైన్​ నేతృత్వంలో వైద్యుల బృందం ఆయనకు ఆపరేషన్ చేసి ఓ ఇనుపముక్క (కత్తి)ని తీసివేశారు. ప్రస్తుతం సైఫ్​ ఆరోగ్య పరిస్థితి బాగానే ఉందని ఆయన్ను అబ్జర్వేషన్ లో ఉంచినట్లు ఆసుపత్రి సీఓఓ నీరజ్​ తెలిపారు.

ఈ దాడితో ఒక్కసారిగా బాలీవుడ్​ లో తీవ్ర కలకలం సృష్టించింది. పలువురు సైఫ్​ పై దాడిని తీవ్రంగా ఖండించారు. వెంటనే నిందితుడిపై కఠిన చర్యలు తీసుకోవాలని మహారాష్​ర్ట ప్రభుత్వం, పోలీసులకు విజ్ఞప్తి చేశారు. సైఫ్​ త్వరగా కోలుకోవాలని ఆకాంక్షించారు. 

విషయం తెలుసుకున్న పోలీసులు పెద్ద ఎత్తున సైఫ్​ ఇంటివద్ద, ఆసుపత్రి వద్ద భద్రతను పటిష్టం చేశారు. ప్రత్యేక బృందాలు ఆయన ఇంటిలో ఉన్న సీసీ కెమెరాలను జల్లెడ పడుతున్నారు. వాచ్​ మెన్లు, ఇంటి పనిమనుషులను విచారిస్తున్నారు. ఇంత భద్రత ఉన్నా నిందితుడు ఇంటిలోని ఏడో అంతస్థులకు ఎలా చేరుకున్నాడు, ఎప్పుడు చేరుకున్నాడనే విషయంపై అన్ని కోణాల్లోనూ ఆరా తీస్తున్నారు.

బాలీవుడ్​ ప్రముఖులపై దాడుల బెదిరింపులు, ఇళ్లపై దాడులతో ఇప్పటికే భయాందోళనలు సృష్టిస్తుండగా సైఫ్​ పై తాజా దాడితో ప్రముఖుల భద్రతపై అభిమానుల్లో ఆందోళన వ్యక్తం అవుతుంది.