డీఈవో ఇంట్లో నోట్ల కట్టలు

పాట్నా: బిహార్​ బెట్టియా జిల్లా విద్యాశాఖాధికారి (డీఈవో) రజనీకాంత్​ ప్రవీణ్​ నివాసంపై విజిలెన్స అధికారులు ఆకస్మిక దాడి చేశారు. ఈ దాడిలో అధికారుల కళ్లు బైర్లు కమ్మేలా నోట్ల కట్టలు బయటపడ్డాయి. గురువారం అధికారి బసంత్​ బిహార్​ కాలనీ ఇంట్లో నిర్వహించిన సోదాల్లో రెండు మంచాల నిండా నోట్ల కట్టలు దర్శనమిచ్చాయి. దీంతో అధికారులు అవాక్కయ్యారు. భారీ మొత్తం ఎంత ఉందనేది తేల్చేందుకు నోట్ల లెక్కింపు మిషన్లు తెప్పించి లెక్కిస్తున్నారు. మరోవైపు అధికారి ప్రవీణ్​ ను విచారిస్తున్నారు. ఈ విషయంపై డీఈవో కార్యాలయ సిబ్బందిని సైతం అధికారులు విచారిస్తుండగా ఎవ్వరూ నోరు మెదపడం లేదు. ప్రవీణ్​ గత మూడేళ్లుగా ఈ ప్రాంతంలో విధులు నిర్వహిస్తున్నాడు. ఆయన సంబంధికులు పెద్ద ఎత్తున ఇంటికి చేరుకోవడంతో అధికారులు పోలీసు బలగాలను భారీ ఎత్తున మోహరించాల్సి వచ్చింది. 
డీఈవోపై పలు అవినీతి ఆరోపణల నేపథ్యంలో విజిలెన్స్​ బృందం విచారించేందుకు, సోదాలు చేపట్టేందుకు ఇంటికి రాగా ఆరోపణలు వాస్తవమేననే వాదనలూ వినిపిస్తున్నాయి.