డోపింగ్​ నిరోధకత పాఠ్యాంశాల్లో చేర్చాలి

నా తెలంగాణ, న్యూ ఢిల్లీ: క్రీడల్లో పారదర్శకత పెంపు, పోటీని ప్రోత్సహించడానికి అన్ని రకాల చర్యలు తీసుకుంటున్నామని డోపింగ్​ నిరోధకతను పాఠ్యాంశాల్లో చేర్చాలని కేంద్ర యువజన వ్యవహారాలు, క్రీడలు, కార్మిక, ఉపాధిశాఖ మంత్రి డాక్టర్​ మన్సుఖ్​ మాండవీయా అన్నారు. బుధవారం న్యూ ఢిల్లీలో నిర్వహించిన ఎన్​ డీటీఎల్​ 2025 (నేషనల్​ డోపింగ్​ టెస్టింగ్​ లాబొరేటరీ) వార్షిక సమావేశాన్ని ప్రారంభించి ప్రసంగించారు. ఈ సమావేశంలో మాట్లాడుతూ.. డోపింగ్​ నిరోధకతపై గ్రామీణ ప్రాంతాల్లో అవగాహన ప్రచారం చేపట్టాలని సూచించారు. నిబంధనలు తెలిపేందుకు క్రీడా సమాఖ్యలు చొరవ తీసుకోవాలన్నారు. క్రీడాకారుల భవిష్యత్​ ను కాపాడేందుకు కృషి చేయాలని సూచించారు. డోపింగ్​ గుర్తింపులో అత్యాధునిక పరిశోధన, సాంకేతికత ప్రాముఖ్యాన్ని నొక్కి చెప్పారు. 

నిషేధిత పదార్థాల పరిణామ స్వభావం, ఉద్భవిస్తున్న ముప్పులను ఎదుర్కోవడానికి వ్యూహాలను ఈ సమావేశంలో చర్చించామన్నారు. ఇలాంటి సమావేశాలు, చర్చల్లో యువ క్రీడాకారులు చురుకుగా పాల్గొనాలని, తద్వారా వారి నైతిక క్రీడా పద్ధతుల పట్ల నిబద్ధత ప్రతిబింబిస్తుందని మాండవీయా స్పష్టం చేశారు. ఈ సమావేశం డోపింగ్​ రహిత క్రీడా సంస్కృతిని పెంపొందించే దిశగా ముఖ్యమైన అడుగని కేంద్రమంత్రి మన్సుఖ్​ మాండవీయా స్పష్టం చేశారు.