ఆల్ర్పాజోలం, గుల్ఫారం పట్టివేత ముగ్గురు అరెస్ట్

నా తెలంగాణ, హైదరాబాద్: కల్తీకల్లుకు ఉపయోగించే ఆల్ర్పాజోలం, గుల్ఫారం అక్రమ రవాణా చేస్తున్న ముఠాను సోమవారం సైబరాబాద్​ ఎస్వోటీ పోలీసులు పట్టుకున్నారు. రంగారెడ్డి జిల్లా కొత్తూరు పోలీస్​ స్టేషన్​ పరిధిలో ఎస్వోటీ పోలీసులు వాహనాల తనిఖీలు చేస్తుండగా మారుతి స్విఫ్ట్ లో కేజీ ఆల్ర్పాజోలం, గుల్ఫారం స్వాధీనం చేసుకున్నారు. ఈ ఘటనలో ముగ్గురు నిందితులను అదుపులోకి తీసుకున్నారు. స్వాధీనం చేసుకున్న వీటి విలువ రూ. 15 లక్షలు ఉంటుందని పోలీసులు తెలిపారు. విచారణలో నాగర్​కర్నూల్‌కు చెందిన నర్సింహులు ఆల్ర్పాజోలం తయారు చేస్తునట్లు పోలీసులు నిర్ధారించారు. నర్సింహులు నుంచి నిందితులు ఆల్ర్పాజోలం సేకరించి వివిధ జిల్లాల్లోని కల్లు దుకాణాలకు విక్రయిస్తున్నట్లు పోలీసులు తెలిపారు. ఈ అక్రమ రవాణా ద్వారా వచ్చిన నగదుతో నిందితుడు అనిల్ గౌడ్ మారుతి స్విఫ్ట్ కారును కొనుగోలు చేసినట్లు పేర్కొన్నారు. స్వాధీనం చేసుకున్న కేజీ ఆల్ర్పాజోలం 6 లక్షల లీటర్ల కల్లులో కలపడానికి సరిపోతుందని వివరించారు. సుమారు 600 లీటర్లలో దీనిని ఒక గ్రాము కలుపుతారని వెల్లడించారు. నిందితుల నుంచి 3 సెల్​ఫోన్లు, ఓ కారు స్వాధీనం చేసుకున్నామని చెప్పారు. దీనిపై కేసు నమోదు చేసి దర్యాప్తు చేస్తున్నట్లు చెప్పిన పోలీసులు మరోవైపు కల్తీ కల్లును సేవించిన రోజువారీ కూలీలు ఎన్నో రుగ్మతలకు లోనవుతున్నారని అన్నారు.