నకిలీ వైద్యుడిపై చర్యలు ఆసుపత్రుల్లో ఆకస్మిక తనిఖీలు

నా తెలంగాణ, డోర్నకల్: మరిపెడలోని ప్రథమ చికిత్స కేంద్రాలపై మరోసారి జాతీయ, రాష్ర్ట వైద్యమండలి ఆదేశాల మేరకు మెడికల్​ టాస్క్​ ఫోర్స్​ టీం సోమవారం దాడులు నిర్వహించింది. యాంటీబయోటిక్​ మేరోపినం లాంటి మందులను తరచూ వాడుతుండడంపై మెడికల్​ కౌన్సిల్​ ఇటీవలే పలు హెచ్చరికలు కూడా జారీ చేసినా వినకపోవడంతో ఈ దాడులు చేసినట్లుగా తెలుస్తోంది. డా. వేములపల్లి నరేష్​ కుమార్​, డా. కొలిపాక వెంకటస్వామి బృందం తనిఖీలు చేపట్టింది. ఈ తనిఖీల్లో నకిలీ వైద్యుడు వీరస్వామిని అదుపులోకి తీసుకున్నారు. వీరస్వామికి ఎలాంటి వైద్య చికిత్స అర్హత లేకపోయినా ఉమాశంకర్​ క్లినిక్​ ను ఏర్పాటు చేసి వచ్చిరాని వైద్యంతో ప్రజల ప్రాణాలతో చెలగాటం ఆడుతున్నట్లుగా ఈ బృందం గుర్తించింది. ఐసీయూల్లో వాడే మెరోపినం, పిపర్సిలీన్​ టాజోబాక్టమ్​ లాంటి వాటిని వాడుతున్నట్లు గుర్తించింది. చిన్నజబ్బులకు కూడా ఈ మందులను వాడితే రోగి ప్రాణం పోయే అవకాశం కూడా ఉందని డా. నరేష్ కుమార్​ తెలిపారు. విశేషం ఏమిటంటే ఒకరోజు ముందు డీఎంహెచ్​ వో తనిఖీలు నిర్వహించినా వీరస్వామి ఉల్లంఘనలు గుర్తించలేదు. అంతే జిల్లా వైద్యాధికారులు కూడా ఇతనికి వంతపాడుతున్నట్లు తెలుస్తోంది. వీరస్వామిపై ఎన్​ఎంసీ చట్టం 34, 54 ప్రకారం కేసులు నమోదు చేసి చర్యలు తీసుకుంటామని వైద్య బృందం ప్రకటించింది. 

పలువురు వైద్యులు తనిఖీలకు వస్తున్నామన్న విషయం ముందుగానే తెలుసుకొని వారి వద్ద ఉన్న మెడికల్​ వేస్టేజ్​ ను బయట వేసి తగులబెడుతున్నారని అన్నారు. దీంతో పర్యావరణానికి తీవ్ర ముప్పు ఏర్పడుతుందన్నారు. ఇలాంటి విషయాలపై కూడా దృష్టి సారించి వారిపై చర్యలు తీసుకోనున్నట్లు తనిఖీకి వచ్చిన అధికారుల బృందం తెలిపింది.