యూఎన్​ 9మంది బందీలుగా చేసుకున్న హౌతీ తిరుగుబాటుదారులు

నా తెలంగాణ, న్యూ ఢిల్లీ: యెమెన్​ హౌతీలు ఐక్యరాజ్యసమితికి సవాల్​ విసిరారు. ఐక్యరాజ్యసమితి బృందానికి చెందిన 9మందిని, మరికొంతమందిని బందీలుగా చేసుకున్నారు. శుక్రవారం ఈ ఘటనకు పాల్పడ్డారు. దీంతో ఐక్యరాజ్య సమితి తీవ్ర ఆగ్రహం వ్యక్తం చేసింది. ఎర్ర సముద్రంలో హౌతీ తిరుగుబాటుదారులు తీవ్ర కలకలం సృష్టిస్తున్నారు. నౌకలపై దాడులు, ఉద్యోగులపై దాడులు చేస్తూ విధ్వంసం సృష్టిస్తున్నారు. ఈ నేపథ్యంలో యూఎన్​ నేతృత్వంలోని అమెరికా, బ్రిటన్​ దళాలు యెమెన్​ లో హౌతీ తిరుగుబాటుదారులపై వైమానిక దాడులు చేశాయి. ఈ దాడికి ప్రతిచర్య కోసం వీరు ఎదురు చూస్తున్నారు. శుక్రవారం అదను చూసుకొని ఐక్యరాజ్యసమితి బృందంపై దాడులకు పాల్పడి ఉద్యోగులను బందీలుగా చేసుకున్నారు. గాజాపై ఇజ్రాయెల్​ దాడులను కూడా వీరు తీవ్రంగా వ్యతిరేకిస్తు సముద్ర మార్గంలో వస్తున్న ఇతర దేశాల నౌకలను లక్ష్యంగా చేసుకొని రెచ్చిపోతున్నారు. యూఎన్​ అధికారులు ఈ ఘటనపై స్పందించారు. పరిస్థితిని సమీక్షిస్తున్నామని తెలిపారు. అరెస్టు అయిన వారిలో యూఎన్​ బృందానికి చెందిన అధికారులు ఉన్నారని, ఒకరు మహిళా ఉద్యోగిని అని తెలిపారు. మిగతా వివరాలు వెల్లడించేందుకు నిరాకరించారు. కాగా హౌతీ చర్యలపై అమెరికా, బ్రిటన్​ దళాలతోపాటు ఐక్యరాజ్యసమితిలో సభ్యదేశాలుగా ఉన్న నాటూ దళాలు కూడా మండిపడుతున్నాయి. బందీలను వెంటనే సురక్షితంగా విడవకపోతే తీవ్ర పరిణామాలుంటాయని హెచ్చరించారు.