అమెరికాలో విమానం, హెలికాప్టర్​ ఢీ 18 మంది మృతదేహాలు లభ్యం

కొనసాగుతున్న రెస్క్యూ చర్యలు
పోటోమాక్​ నదిలో పడ్డ విమానాలు
డోనాల్డ్​ ట్రంప్​ విచారం
1982లో కూడా ఇదే తరహా ఘటనలో 78 మంది మృతి

వాషింగ్టన్​ డీసీ: అమెరికా వాషింగ్టన్​ డీసీలోని రోనాల్డ్​ రీగన్​ ఎయిర్​ పోర్ట్​ కు సమీపంలో ఘోర ప్రమాదం జరిగింది. ఒక విమానం, హెలికాప్టర్​ ఒకదానికొకటి ఢీకొన్నాయి. రెండు విమానాలు పోటోమాక్​ నదిలో పడిపోయాయి. బుధవారం రాత్రి 9 గంటల ప్రాంతంలో ఈ ప్రమాదం చోటు చేసుకుంది. రెస్క్యూ చర్యల్లో గురువారం ఉదయం వరకూ 18 మంది మృతదేహాలను బయటికి తీశారు. యూఎస్​ ఎయిర్​ లైన్స్​ కు చెందిన సీఆర్​ జె 700 బొంబార్డియర్​ జెట్​, ఆర్మీకి చెందిన  బ్లాక్​ హాక్​ (హెచ్​ 60) హెలికాప్టర్​ ల మధ్య ఈ ప్రమాదం జరిగింది. హెలికాప్టర్​ లో ముగ్గురు వ్యక్తులు ప్రయాణిస్తుండగా, విమానంలో నలుగురు సిబ్బంది సహా 64 మంది ప్రయాణిస్తున్నారు. బొంబార్డియర్​ జెట్​ కాన్సాస్​ నుంచి వాషింగ్టన్​ కు వస్తుండగా ఈ ప్రమాదం చోటు చేసుకుంది. సైనిక హెలికాప్టర్​ బ్లాక్​ హాక్​ శిక్షణ విమానమని అధికారులు వివరించారు. విమాన శకలాలు పోటోమాక్​ నదిలో ఉన్నాయి. రెస్క్యూ చర్యల్లో యూఎస్​ పార్క్ పోలీస్, డీసీ మెట్రోపాలిటన్ పోలీస్ డిపార్ట్‌మెంట్, యూఎస్​ ఆర్మీతో సహా పలు ఏజెన్సీలు పాల్గొంటున్నాయి. ఘటనా స్థలంలో ఫైర్​ బోట్లను కూడా భారీ ఎత్తున మోహరించారు. 

ప్రమాద ఘటనపై అమెరికా అధ్యక్షుడు డోనాల్డ్​ ట్రంప్​ తీవ్ర విచారం వ్యక్తం చేశారు. రెస్క్యూ చర్యలు కొనసాగుతున్నాయని, అంతవరకు రీగన్​ ఎయిర్​ పోర్ట్​ లో విమాన రాకపోకలు రద్దు చేశామని యూఎస్​ హోం సెక్రెటరీ తెలిపారు. 

1982 జనవరి 13న కూడా పోటోమాక్​ లో ఎయిర్​ ఫ్లోరిడా విమానం కూలిపోయిన ఘటనలో 78మంది ప్రయాణికులు మృతి చెందారు. ఆనాటి ప్రమాదమే గుర్తుకు వస్తుందని పలువురు సీరియర్​ అధికారులు వివరించారు.