బంగ్లాలో 17 క్రైస్తవుల ఇళ్లు దగ్ధం

ఫిర్యాదు అందితే చర్యలు తీసుకుంటామన్న పోలీసులు

రెండు పార్టీల వైరంలో సమిధలుగా మారుతున్న మైనార్టీలు

ఢాకా: బంగ్లాదేశ్​ లో క్రిస్మస్​ పర్వదినం రోజు ముష్కర మూకల దాడి ఘటన చోటు చేసుకుంది. ఈ వివరాలు గురువారం వెలుగులోకి వచ్చాయి. పర్వదినాన్ని పురస్కరించుకొని క్రైస్తవ సోదరులు ప్రార్థనలు చేసేందుకు వెళ్లగా 17 మంది ఇళ్లను ముష్కరులు తగులబెట్టారు. ఈ దాడులు బందర్భన్​ చిట్టగాంగ్​ హిల్​ ట్రాక్ట్స్​ ఎస్పీ గార్డెన్​ లో జరిగాయి. దీంతో బాధితులు గూడుకోల్పోయి తీవ్ర నిరాశ, నిర్వేదంలో ఉన్నారు. తాము ఎలా బతకాలని కన్నీరుమున్నీరవుతున్నారు. ముష్కరులు జరిపిన ఈ దాడిలో 15 లక్షల టాకా (బంగ్లా కరెన్సీ) నష్టం వాటిల్లిందని లబోదిబోమన్నారు. వివరాలందుకున్న పోలీసులు మంటలు చల్లారక ఘటనా స్థలిని పరిశీలించడంపై క్రైస్తవ సమాజం నుంచి తీవ్ర ఆరోపణలు, విమర్శలు వస్తున్నాయి. కాగా ఈ ఘటనపై ఎలాంటి ఫిర్యాదు అందలేదని, అందితే చర్యలు తీసుకుంటామని పోలీసులు తెలపడం వెనుక తీవ్ర ఆగ్రహావేశాలు వ్యక్తం అవుతున్నాయి. కాగా బాధితులు నివసిస్తున్న ఈ ఫౌంహౌస్​ హసీనా ప్రభుత్వానికి చెందిన సీనియర్​ అధికారి బెనజీర్​ అహ్మద్​ కు చెందినది కావడం విశేషం. రెండు పార్టీల వైరం కాస్త ఇతర మతాలు, దేవాలయాలపై చూపుతూ వారిని సమిధలు చేస్తున్నారని మానవహక్కుల సంఘాలు, పలు దేశాలు ఆగ్రహం వ్యక్తం చేశాయి. వెంటనే ఈ దాడులపై చర్యలు తీసుకోవాలని లేకుంటే తీవ్ర పరిణామాలు తప్పవని హెచ్చరించారు.