మణిపూర్​ లో ఎన్​ కౌంటర్​  11 మంది ఉగ్రవాదులు హతం

ఐదుగురు కిడ్నాప్​
ఉగ్ర కాల్పుల్లో ఒక జవాన్​ పరిస్థితి విషమం, రైతు మృతి
పోలీస్​ స్టేషన్​, సహాయక శిబిరమే లక్ష్యంగా కుకీ ఉగ్రవాదుల ఘాతూకం

ఇంఫాల్​: మణిపూర్‌ జిరిబామ్ జిల్లాలో సోమవారం జరిగిన ఎన్‌కౌంటర్‌లో 11 మంది కుకీ ఉగ్రవాదులను అసోం రైఫిల్స్​, సీఆర్పీఎఫ్​ సంయుక్తంగా జరిపిన ఎన్​ కౌంటర్​ లో హతమార్చారు. బోరోబెకెరాలోని జకురాడోర్ కరోంగ్ ప్రాంతంలో మధ్యాహ్నం 2.30 గంటలకు ఎన్​ కౌంటర్​ జరిగింది. పోలీస్ స్టేషన్, సీఆర్పీఎఫ్ పోస్టులపై ఉగ్రవాదులు మూకుమ్మడిగా, వ్యూహాత్మకంగా దాడి చేశారు.

ఎదురుకాల్పుల్లో ఇద్దరు సీఆర్పీఎఫ్​ జవాన్లకు గాయాలయ్యాయి. వీరిలో ఒకరి పరిస్థితి విషమంగా ఉంది. పోలీసు స్టేషన్​ కు సమీపంలోనే సహాయక శిబిరం ఉంది. ఈ శిబిరమే టార్గెట్​ గా కుకీ ఉగ్రవాదులు ప్రణాళిక ప్రకారం సైనిక దుస్తుల్లో వచ్చి ఉన్నపళంగా కాల్పులకు తెగబడ్డారు.

గతంలో కూడా ఇలాంటి కాల్పులు చోటు చేసుకోవడంతో ఇక్కడ భద్రత పెంచారు. ఉగ్రవాదుల వద్ద అత్యాధునిక ఆయుధాలు, మందుగుండు సామాగ్రిని భద్రతా దళాలు స్వాధీనం చేసుకున్నాయి. ఎన్​ కౌంటర్​ లో మృతిచెందిన ఉగ్రవాదుల మృతదేహాలను బోరోబెకెరా పోలీస్ స్టేషన్‌లో ఉంచారు. పోలీస్​ స్టేషన్​, శిబిరంపై దాడిచేశాక ఉగ్రవాదులు స్థానికంగా ఉన్న ఇళ్ల వైపు పరిగెత్తి ఇళ్లకు నిప్పు పెట్టారు. ఎదురు జవాబిస్తున్న భద్రతా బలగాలపై కాల్పులకు తెగబడ్డారు.

ఉగ్రవాదులు ఐదుగురిని కిడ్నాప్​ చేసినట్లుగా అధికర వర్గాలు ప్రకటించాయి. వీరంతా యైంగాంగ్‌పోక్పి శాంతిఖోంగ్‌బన్ ప్రాంతంలో పొలాల్లో పనిచేస్తున్న రైతులుగా పేర్కొంటున్నా కిడ్నాపైన వారి విషయంలో సందిగ్ధత కొనసాగుతోంది.  ఈ కాల్పుల్లో ఓ రైతు కూడా మృతిచెందినట్లు అధికారులు ప్రకటించారు. 

ఈ ఎన్​ కౌంటర్​ తో​ పోలీసులు, భద్రతా బలగాలు అలర్టయ్యాయి. చుట్టుపక్కల ప్రాంతాల్లో భారీగా అదనపు బలగాలను మోహరించారు.