మహాకుంభమేళాపై దుష్ప్రచారం సహించబోం

లక్నో: మహా కుంభమేళాను ఒకవైపు ప్రపంచం కీర్తిస్తుంటే, మరోవైపు కాంగ్రెస్​, మిత్రపక్షాలు దుష్ప్రచారం చేయడాన్ని సహించబోమని, సనాతన ధర్మాన్ని అగౌరవపరిచే ప్రయత్నాలను కూడా సహించబోమని ఉత్తరప్రదేశ్ ముఖ్యమంత్రి యోగి ఆదిత్యనాథ్ స్పష్టం చేశారు. బుధవారం అసెంబ్లీలో చర్చ సందర్భంగా ఎస్పీ, కాంగ్రెస్​ లపై విరుచుకుపడ్డారు. మహాకుంభమేళా కేవలం మతపరమైన కార్యక్రమం కాదని, భారతదేశ సాంస్కృతిక, ఆధ్యాత్మిక వారసత్వానికి ప్రతీక అని అన్నారు. ఈ మహోత్తర కార్యక్రమంలో తప్పుడు సమాచారాన్ని ప్రతిపక్షాలు వ్యాప్తి చేస్తున్నాయన్నారు. సనాతన ధర్మం దేశ ఆత్మ, గౌరవాన్ని నిలబెట్టడం మనందరి కర్తవ్యమన్నారు. తప్పుడు కథనాలు, వ్యాఖ్యలతో చేస్తున్న ప్రయత్నాలను ఎన్నటికీ సహించబోమన్నారు. ఈ చారిత్రాత్మక కార్యక్రమాన్ని ఘనంగా నిర్వహించేందుకు ప్రభుత్వం కట్టుబడి ఉందన్నారు. దేశ సనాతన దర్మం, ఆధ్యాత్మికం, సాంస్కృతిక ప్రాముఖ్యతలను విపక్షాలు విస్మరించాయని యోగి కాంగ్రెస్​, మిత్రపక్షాలను తూలనాడారు.