అక్రమ ఆయుధాలు అప్పగించాలి

ఇంఫాల్​: అక్రమంగా ఆయుధాలు కలిగి ఉన్న, దోచుకున్న ఆయుధాలను ఏడు రోజుల్లోగా అప్పగించాలని మణిపూర్​ ప్రభుత్వ ప్రధాన కార్యదర్శి పికె సింగ్ చెప్పారు. ఆదివారం ఆయన మణిపూర్​ శాంతిభద్రతలకు తీసుకున్న చర్యలపై మీడియాకు వివరించారు. చట్టవిరుద్ధంగా ఆయుధాలున్నవారు వాటిని వెంటనే అప్పజెప్పాలన్నారు. ప్రభుత్వం నిర్దేశించిన సమయంలో అందజేస్తే వారిపై ఎలాంటి చర్యలు ఉండబోవన్నారు. సమయం మించిపోయి భద్రతా దళాల ఆపరేషన్​ లో ఆయుధాలు లభిస్తే మాత్రం కఠిన చర్యలు తప్పవని హెచ్చరించారు. ఆయుధాల ద్వారా మణిపూర్​ శాంతిభద్రతలకు భంగం వాటిల్లేలా ప్రయత్నిస్తే కఠిన చర్యలు తప్పవన్నారు. ప్రభుత్వం మణిపూర్​ ప్రజల మనోభిప్రాయాలకు గౌరవం ఇస్తుందన్నారు. అదే సమయంలో విభిన్న రకాల ప్రజల మనోభావాలను గౌరవిస్తూనే ఈ ప్రాంత అభివృద్ధి, శాంతి, సుస్థిరతలను కాపాడుతుందని పికె సింగ్ స్పష్టం చేశారు. రాష్ట్రపతి పాలన విధించాక మణిపూర్​ గవర్నర్​ అజయ్​ కుమార్​ భల్లా కూడా అక్రమ ఆయుధాలను అప్పగించాలని విజ్ఞప్తి చేశారు.