పెరుగుతున్న మూహూర్తపు ప్రసవాలు

ఎన్​ఎఫ్​ హెచ్​ ఎస్​ డేటాలో వెల్లడి

నా తెలంగాణ, సెంట్రల్​ డెస్క్​: తెలుగు రాష్ర్టాల్లో మూహూర్తపు డెలివరీ ట్రండ్​ రోజురోజుకు పెరుగుతుంది. పలానా రోజు మంచిది అని ముందే నిర్ణయించుకొని ప్రసవానికి సిద్ధం అవుతున్నారు. ఇటీవల అయోధ్య రామ మందిర ప్రారంభోత్సవం రోజు కూడా పెద్ద ఎత్తున ప్రసవాలకు డిమాండ్​ వచ్చిన విషయం తెలిసిందే. అమెరికాలోని ట్రంప్​ నూతన చట్టంతో జడుసుకొని ఆయన ప్రమాణ స్వీకారానికి ముందే ప్రసవాలకు సిద్ధమయ్యారు. ప్రపంచ వ్యాప్తంగా ఈ ట్రెండ్​ కొనసాగుతున్నా, ప్రస్తుతం రెండు తెలుగు రాష్ర్టాల్లోనూ ఈ తరహా ప్రసవాల సంఖ్య బాగా పెరిగిపోతుంది. ముఖ్యంగా ప్రైవేట్​ ఆసుపత్రుల్లో జరుగుతున్న 25 శాతం ప్రసవాలు ముందే నిర్ణయించుకున్న తేదీ, సమయంలో జరుగుతున్నట్లు తెలుస్తుంది. జాతీయ కుటుంబ ఆరోగ్య సర్వే (ఎన్​ఎఫ్​ హెచ్​ ఎస్​) డేటా ప్రకారం 2015–16లో ఈ రకమైన ప్రసవాలు 17.2 శాతం, 2019–21 వరకు 21.5 శాతం నమోదయ్యాయి. అయితే ఈ తరహా ప్రసవాల్లో తల్లీ, బిడ్డల ఆరోగ్యానికి కూడా ప్రాధాన్యతనిస్తే బాగుంటుందని, అందుకే ఇలాంటి మూహూర్తపు ప్రసవాలకు దూరంగానే ఉంటే బాగుంటుందని జాతీయ కుటుంబ ఆరోగ్య సర్వే సూచిస్తుంది. 

ప్రమాదం లేకుంటే ఓకే..
కాగా ఈ తరహా ప్రసవాలతో గర్భీణులకు ప్రమాదం లేదా అంటే లేదనే అంటున్నారు గైనకాలజిస్ట్​ వైద్యులు. ముందుగా గర్భినీ స్ర్తీ వయస్సు, ప్రసవ సమయం, అత్యవసర పరిస్థితులు తలెత్తవనుకుంటేనే వారి కోరికను ఒప్పుకుంటామని చెబుతున్నారు. జ్యోతిష్కులను, పూజారులను, దేశంలో ఏదైనా ముఖ్యమైన మూహుర్తం, సంఘటన రోజు ప్రసవాలు జరగాలని చాలామంది భావిస్తున్నట్లు తెలిపారు. ఈ తరహా ప్రసవాల్లో ప్రమాదం లేకుంటేనే ఒప్పుకుంటామని, లేకుంటే ఆ రకం ప్రసవాలకు నిరాకరిస్తున్నట్లు తెలిపారు. అయితే ఈ రకమైన ప్రసవాల్లో తొలిసారి ప్రసవాలే ఎక్కువగా ఉంటున్నట్లు తెలిపారు. అదే సమయంలో సాంప్రదాయకంగా ప్రసవాలు కూడా పెరుగుతున్నాయి. బిడ్డ ఎప్పుడు పుడతారని వైద్యులు చెప్పినా, ఆ తరువాత కానీ, ముందే గానీ ప్రసవాలు చేయాలనే డిమాండ్​ ఎక్కువగా ఉంటుంది. పుట్టబోయే బిడ్డ భవిష్యత్​ బాగుండాలని తల్లిదండ్రులు, తోబుట్టువులు నిర్ణయించి ఇలాంటి ప్రసవాలకు ముందుకు వెళుతున్నారు. 

బ్రహ్మమూహూర్తంలో ప్రసవాలకు వైద్యుల కొరత..
హైదరాబాద్​ మహానగరంలో కూడా ఈ తరహా ప్రసవాలకు భారీ డిమాండ్​ ఉందన్నారు. ఒక్కోసారి అయితే మంచి మూహుర్తం రోజున బయటి నుంచి గైనకాలజిస్టులను పిలుచుకొని ఒకేసమయంలో ప్రసవాలకు ఉపక్రమిస్తున్నట్లు పేరు చెప్పేందుకు ఇష్టపడని ప్రముఖ ఆసుపత్రి వైద్యురాలు చెప్పడం విశేషం. అయితే ఈ తరహా ప్రసవాలు పూర్తి పరిణితి ఉన్న వైద్యులు మాత్రమే చేయగలరని, అదీ గర్భిణీ ఆరోగ్య పరిస్థితులు పూర్తిగా అవగాహన ఉండే వైద్యులైతే మరింత విజయవంతంగా ప్రసవాల రేటు ఉంటుందని తెలిపారు. నార్మల్​, సిజేరియన్​ డెలివరీలన్నది ముందుగా వైద్యుల ప్రాథమికత నార్మల్ ప్రసవానికి ఉంటుందన్నారు. పలు రకాల ఆరోగ్యపరిస్థితుల దృష్ట్యా సిజేరియన్​ లు తప్పడం లేదన్నారు. అదే సమయంలో సిజేరియన్​ ద్వారానే సదరు గర్భిణీ స్ర్తీకి బిడ్డ పుడతారని పూర్తి నిర్ధారణ అనంతరమే ఈ రకమైన మూహూర్తపు ప్రసవాలకు ఆస్కారం ఉంటుందన్నారు. 

బిడ్డ భవిష్యత్​ తల్లిదండ్రులే రాసుకుంటున్నారా?..
ఇలాంటి డెలివరీలు ఎంతమాత్రం గర్భిణీ స్ర్తీలకు మంచివి కావని, భవిష్యత్​ లో ఆరోగ్య సమస్యలు ఉత్పన్నం అయ్యే అవకాశాలు కూడా లేకపోలేవంటున్నారు. వీటిని దృష్టిలో పెట్టుకునే ముందుగా తాము మూహూర్తపు డెలివరీలను ప్రోత్సహించమని తిరస్కరిస్తామన్నారు. అయినా ఆసక్తిని ప్రదర్శించిన వారి పూర్తి హెల్త్​ చెకప్​ తరువాతే నిర్ణయం తీసుకుంటామన్నారు. చాలామంది బ్రహ్మమూహూర్తంలో వేకువజామున 3 గంటలకు డెలివరీలో చేయాలనే డిమాండ్​ కూడా ఉంటుందని, అలాంటప్పుడు వైద్యులు అప్పటికే అలసిపోయి ఉండడం వల్ల ప్రసావాలకు అనుకూలంగా ఉండడం లేదన్నారు. అలాంటి పరిస్థితుల్లో ఇతర ఆసుపత్రుల్లోని స్పెషలిస్ట్​ వైద్యుల పర్యవేక్షణలో మాత్రమే ఇలాంటి ప్రసవాలకు ఉపక్రమిస్తామన్నారు. ఏది ఏదైతేనేం సమయానికి ముందే, తరువాతో శుభమూహూర్తాన బిడ్డ కెవ్వు కేక విని భవిష్యత్​ ను ముందే తామే రాసుకున్నట్లు సంతోషపడిపోతున్నారు తల్లిదండ్రులు.