ఇండోనేషియాలో అగ్నిపర్వతం విస్ఫోటనాలు

న్యూఢిల్లీ: ఇండోనేషియాలోని రుయాంగ్ పర్వతంపై బుధవారం నుంచి అగ్నిపర్వత విస్ఫోటనాలు నిరంతరంగా కొనసాగుతున్నాయి. గురువారం కూడా విస్ఫోటనాలు జరుగుతుండడంపై ఆందోళన వ్యక్తం అవుతోంది. అయితే విస్ఫోటనాలు మంగళవారం రాత్రి నుంచే జరుగుతున్నా బుధవారం నుంచి తీవ్రతరమైనట్లు అధికార వర్గాలు గుర్తించారు. రువాంగ్​ ప్రాంతాల్లో నివసిస్తున్న 11 వేల మందిని  అధికారులు సురక్షిత ప్రాంతాలకు తరలించారు. విమానాశ్రయాన్ని మూసివేశారు. లావా, బూడిద పెద్ద యెత్తున వెలువడుతుండడంతో సునామీ హెచ్చరికలు కూడా జారీ చేశారు.

రువాంగ్​ పర్వతంపై తరచూ పేలుళ్లు జరుగుతుంటాయని అధికార వర్గాలు వివరించారు. 
ఇటీవల సంభవించిన భూకంపం వల్లే ఇక్కడి టెక్టోనిక్ ప్లేట్లు అస్థిరంగా మారాయని, ఇవే అగ్నిపర్వత విస్ఫోటనాలకు కారణమవుతున్నాయని అధికారులు వివరించారు. అగ్ని పర్వతం సమీపంలోని ఆరు కిలోమీటర్ల వరకు ప్రత్యేక జోన్​ గా ప్రకటించి అందరిని ఖాళీ చేయించారు. 

ఇండోనేషియాలో 120 చురుకైన అగ్నిపర్వతాలున్నట్లు జియోలాజికల్ ఏజెన్సీ తెలిపింది. ఇండోనేషియా 'రింగ్ ఆఫ్ ఫైర్' ప్రాంతంలో ఉండడంతో ఇక్కడ తరచూ అగ్నిపర్వతాలు పేలుతుంటాయని అధికారులు వివరించారు.