క్విట్​ ఇండియా స్ఫూర్తి.. అవినీతిని తరిమికొట్టే నూతనోద్యమానికి ప్రధాని పిలుపు

నా తెలంగాణ, న్యూ ఢిల్లీ: నాటి క్విట్​ ఇండియా స్ఫూర్తితో అవినీతి, కుటుంబ, బుజ్జగింపు రాజకీయాలను తరిమికొట్టే నూతన ఉద్యమానికి పిలుపునిస్తున్నానని ప్రధాని నరేంద్ర మోదీ పేర్కొన్నారు. శుక్రవారం నాటికి మహాత్మాగాంధీ ఆధ్వర్యంలో నిర్వహించిన క్విట్​ ఇండియా ఉద్యమానికి 82 సంవత్సరాలు గడిచిన సందర్భంగా స్వాతంత్ర్య సమరయోధులకు నివాళులర్పించారు. 

ఈ సందర్భంగా ప్రధాని మాట్లాడుతూ.. వలస పాలన నుంచి విముక్తి కోసం మహాత్మాగాంధీ నాయకత్వంలో క్విట్​ ఇండియా ఉద్యమానికి అంకురార్పణ జరగడం ఆంగ్లేయులకు దడ పుట్టించిందన్నారు. స్వాతంత్ర్య పోరాటంలో ఈ ఉద్యమం ముఖ్యమైన పాత్రను పోషించిందన్నారు. 

క్విట్​ ఇండియా ఉద్యమం వల్ల బ్రిటిష్​ వారు దేశం నుంచి వెళ్లిపోవాలనే ఆలోచనకు బలం చేకూర్చిందన్నారు. ఈ ఉద్యమంలో అనేకమంది హింసకు గురయ్యారని తెలిపారు. అయినా మొక్కవోని దీక్షతో ఉద్యమాన్ని విజయవంతం చేశారని ప్రధాని మోదీ హర్షం వ్యక్తం చేశారు. 

1942లో క్విట్​ ఇండియా ఉద్యమం ముంబైలోని గ్వాలియా నుంచి ప్రారంభమైంది. అప్పటి నుంచి నేటి వరకు ఆగస్ట్​ ను విప్లవ దినంగా కూడా పేర్కొంటారు.