‘గుండుసున్నా’ల పార్టీ కాంగ్రెస్​!

The party of 'gundusunna' is Congress!

Feb 9, 2025 - 16:11
 0
 ‘గుండుసున్నా’ల పార్టీ కాంగ్రెస్​!

అంతర్మథనంలో దిగ్గజ నేతలు

నా తెలంగాణ, సెంట్రల్​ డెస్క్​: కాంగ్రెస్​ కు ‘గుండు సున్నా’ గండం మరింత పొంచి ఉన్నట్లు కనిపిస్తుంది. ఇప్పటికే నాలుగైదు రాష్ర్టాల్లో గుండు సున్నాతో నెట్టుకొస్తున్న పార్టీ కాస్త ఢిల్లీలోనూ ‘తగ్గేదేలే’ అని నిరూపించుకున్నట్లయింది. దీంతో రాహుల్​ గాంధీ, ప్రియాంక గాంధీ, మల్లిఖార్జున ఖర్గే, వేణుగోపాల్​ వంటి బడా నాయకుల పనితీరు పట్లనే ఆ పార్టీలో విశ్వాసం పూర్తిగా కొరవడిందనే వాదనలు వినిపిస్తున్నాయి. అదీ గాక దేశ వ్యాప్తంగా ఈ బడా నాయకులు చేస్తున్న ప్రచారాలు పూర్తిగా అసత్యాలు, అబద్ధాలు, కుటుంబ పాలన దిశగా కొనసాగుతున్నాయి. దీంతో కాంగ్రెస్​ గ్రాఫ్​ దేశంలో భారీగా దిగజారిపోతుంది. ఢిల్లీ, ఆంధ్రప్రదేశ్​, పశ్చిమ బెంగాల్​, సిక్కిం, నాగాలాండ్​ రాష్ర్టాల్లో పార్టీ ‘గుండుసున్నా’కే పరిమితమైంది. 

ఢిల్లీలో 70 స్థానాలకు గాను ఒక్కటంటే ఒక్క స్థానాన్ని కూడా గెలుచుకోకుండా చతికిలపడింది. ఆంధ్రప్రదేశ్​ లోని 164 స్థానాల్లో ఎన్డీయే కూటమి, 11 స్థానాల్లో వైఎస్సార్సీపీ ఎమ్మెల్యేలున్నారు. ఆంధ్రప్రదేశ్​ లో 2024లో జరిగిన ఎన్నికల్లో భారీ ఎత్తున కాంగ్రెస్​ అభ్యర్థులు డిపాజిట్లను సైతం కోల్పోయారు. ఇక్కడా కాంగ్రెస్​ ‘గుండుసున్నా’కే పరిమితమైంది. 294 స్థానాలున్న పశ్చిమ బెంగాల్​ లో టీఎంసీకి 224 మంది ఎమ్మెల్యేలుండగా, బీజేపీకి 66 మంది ఎమ్మెల్యేలున్నారు. ముర్షిదాబాద్​ లోని సాగర్​ డిఘి స్థానంలో కాంగ్రెస్​ తరఫున గెలిచిన అభ్యర్థి కాస్త టీఎంసీలోకి జంప్​ అయ్యాడు. దీంతో ఇక్కడా ‘గుండుసున్నా’ స్థానం పదిలం చేసుకుంది. సిక్కిం 32 స్థానాలకు గాను ఒక్క స్థానంలో కూడా కాంగ్రెస్​ విజయం సాధించలేకపోయింది. ఇక్కడ సిక్కిం క్రాంతికారి మోర్చాతో బీజేపీ జతకట్టి అధికారాన్ని కైవసం చేసుకుంది. ఇక 60 అసెంబ్లీ స్థానాలున్న నాగాలాండ్​ లో 2023లో ఎన్నికలు జరగ్గా ఇక్కడ ఒక్కసీటును సాధించలేక కాంగ్రెస్​ పార్టీ తన హస్తంలో ‘గుండుసున్నా’ను అట్టి పెట్టేసుకుంది. నాగాలాండ్​ లో బీజేపీకి సొంతంగానే 12 మంది అభ్యర్థుల బలం ఉంది. ఇక అరుణాచల్​, మేఘాలయ, మిజోరంలలో చావుతప్పి కన్నులొట్టపోయినట్లు ఒక్కో స్థానమైతే దక్కింది. కానీ ఆ అభ్యర్థులు కూడా రేపోమాపో ఇతర పార్టీల్లోకి మారి కాంగ్రెస్​ ‘గుండుసున్నా’నే అందిస్తారనే వాదనలున్నాయి. మొత్తానికి దేశవ్యాప్తంగా హస్తం ‘గుండుసున్నా’ల పార్టీగా నామకరణం చెందుతుందేమో అనే అభిప్రాయాలు వ్యక్తం అవుతున్నాయి.