కేజ్రీ ఇంటిముందు చెత్తతో మాలివాల్​ నిరసన

నా తెలంగాణ, న్యూ ఢిల్లీ: ఢిల్లీలో పారిశుధ్య వ్యవస్థ అస్తవ్యస్తంగా మారిందని ఇందుకు కారణం ఆప్​ అధినేత కేజ్రీవాలేనని రాజ్యసభ ఎంపీ స్వాతి మాలివాల్​ ఆరోపించారు. గురువారం కేజ్రీవాల్​ ఇంటిముందు మూడుబండ్లతో కూడిన చెత్తను పారబోసి నిరసనను వ్యక్తం చేశారు. ఈ సందర్భంగా స్వాతిమాల్​ మాట్లాడుతూ.. తాను కేజ్రీవాల్​ ను కలిసేందుకే వచ్చానని, తాను ఎవ్వరికీ భయపడనని అన్నారు. ఢిల్లీలోని ప్రతిమూల చెత్తతో నిండిపోయి, మురికి మురికిగా తయారైందన్నారు. తనకు ఏ పార్టీతో సంబంధం లేదన్నారు. కేజ్రీవాల్​ ప్రభుత్వం చర్యలు ఎందుకు తీసుకోవడం లేదని ప్రశ్నించారు. ఇప్పటికైనాపరిస్థితిలో మార్పు రాకుంటే మరోమారు చెత్తను ఆయన ఇంటిముందు వేసి నిరసనను వ్యక్తం చేస్తానని వార్నింగ్​ ఇచ్చారు. ఢిల్లీ రోడ్లన్నీ అధ్వాన్నభరితంగా తయారై మురికి కాలువలు పొంగిపోర్లుతున్నాయని ఆరోపించారు. వికాస్​ పూరి ప్రాంతంలో స్వచ్ఛతపై ఎన్నిసార్లు అధికారులకు, ఆప్​ నాయకులకు వివరించిన లాభం లేకపోవడంతో మహిళలంతా కలిసి తన వద్దకు వచ్చారని తెలిపారు. వారితోబాటు తాను నిరసనకు ఉపక్రమించానని  స్పష్టం చేశారు. కేజ్రీవాల్​ ఇప్పుడు సామాన్యుడు కాదని, ఆయన నేల గురించి ఆలోచించడం లేదని స్వాతిమాలివాల్​ విమర్శించారు. నిరసన చేపడుతున్న మాలివాల్​, మహిళా కార్యకర్తలను పోలీసులు అరెస్టు చేసి స్టేషన్​ కు తరలించారు.