కుంభమేళా తొక్కిసలాట..గుంపులో ఇద్దరు?

ఫోన్లు స్విచ్​ ఆఫ్​
కుట్రకోణంలో ఎస్టీఎఫ్​ ఆరా, పలు అనుమానాలు

లక్నో: మహాకుంభంలో తొక్కిసలాట కుట్ర జరిగిందా? ప్రణాళిక ప్రకారమే కుట్రకు తెరతీశారా? అంటే యూపీ ఎస్టీఎఫ్​ దర్యాప్తు తీరు పలు అనుమానాలను రేకెత్తిస్తున్నాయి. మౌనీ అమావాస్య రాత్రి 1.30 గంటలకు ఘాట్​ వద్ద ఇద్దరు వ్యక్తులు కాషాయ జెండాను చేతబూని గుంపులోకి ప్రవేశించారని గుర్తించారు. ఈ సమయంలోనే తొక్కిసలాట ప్రారంభమైందని గుర్తించారు. సీసీటీవీల ఫుటేజ్​ ఆధారంగా దర్యాప్తులు ఈ విషయం వెల్లడైనట్లు పలువురు అధికారులు వివరించారు. 

ఆ సమయంలో ఆ ప్రాంతంలో యాక్టివ్​ గా ఉన్న మొబైల్​ ఫోన్​ లు కూడా స్విచ్​ ఆఫ్​ లో ఉండడం కూడా అనుమానాలు రేకెత్తించేందుకు కారణమవుతుంది. ప్రస్తుతానికి ఇప్పుడిప్పుడే ఏమీ చెప్పలేమని పూర్తి దర్యాప్తు జరుగుతుందని, మొబైల్​ ఫోన్లు బాధితులవా, లేదా ఎవరైనా భక్తులవి పోయాయా? పడిపోతే ఆ ఫోన్లు, సిమ్​ లు వాడే వారెవరు? ప్రస్తుతం ఎక్కడ ఉన్నారు? లాంటి వివరాలను ఎస్టీఎఫ్​ పోలీసులు కూపీ లాగుతున్నారు. కాగా ఘటన అనంతరం యూపీ డీజీపీ ప్రశాంత్​ కుమార్​ మాట్లాడుతూ ఇందులో కుట్ర కోణం కనిపించడం లేదన్నారు. అయినా దర్యాప్తు అనంతరమే పూర్తి వివరాలు వెల్లడవుతాయని తెలిపారు. 

తొక్కిలాటలో 30 మంది మృతి చెందగా, 60 మందికి గాయాలయ్యాయి. ప్రయాగ్​ రాజ్​ ఆసుపత్రిలో 33 మందికి ఇంకా చికిత్సలు కొనసాగుతున్నాయి. వీరిని కూడా దర్యాప్తు బృందాలు దశల వారీగా విచారించి ఫోన్​ నెంబర్లు, తొక్కిసలాటకు కారణాలపై ఆరా తీస్తున్నారు. తొక్కిసలాట అనంతరం కూడా భారీగా భక్తులు ప్రయోగ్​ రాజ్​ త్రివేణి సంగమంలో పుణ్య స్నానాలు ఆచరించేందుకు వస్తున్నారు. దీంతో శనివారం (ఫిబ్రవరి) వరకు 35 కోట్లమందికి పైగా భక్తులు పుణ్య స్నానాలు ఆచరించగా ఆదివారం రెండుకోట్ల మంది వరకు భక్తులు పుణ్యస్నానాలు ఆచరించే అవకాశం ఉందని భావిస్తున్నారు.