కేజ్రీ, అతిషిలను నిలదీస్తా: స్వాతి మాలివాల్​

నా తెలంగాణ, న్యూ ఢిల్లీ: చాలా రోజుల తరువాత ఆప్​ రాజ్యసభ సభ్యురాలు స్వాతి మాలివాల్​ గురువారం మీడియా ముందుకొచ్చారు. కేజ్రీవాల్​, అతిషిలను నిలదీయాల్సిన సమయం ఆసన్నమైందన్నారు. ఇక బరిలోకి దిగి వారి అనుచిత చర్యలను తిప్పికొడతానన్నారు. గత ఏడేళ్లుగా మురికివాడ ప్రజల బాగోగుల కోసం తాను శాయశక్తులా కృషి చేశానన్నారు. అందుకే తాను పార్టీకి రాజీనామా చేయబోనన్నారు. తనకు ఆప్​ పదవులతో ఎలాంటి సంబంధం లేదన్నారు. అట్టడుగు స్థాయి వర్గాలకు మేలు చేసే వ్యక్తిగానే ఉంటానన్నారు. వారి గళాన్ని ప్రభుత్వాలకు బలంగా వినిపిస్తానన్నారు. ఢిల్లీ మహిళా కమిషన్​ చైర్​ పర్సన్​ గా ఉండగా లక్షా 70వేల కేసులకు పైగా విచారించి న్యాయం చేకూర్చగలిగానని తెలిపారు. తన కృషి వల్లే అత్యున్నత స్థాయికి ఎదిగానన్నారు. కానీ ఆప్​ కేజ్రీవాల్​, పార్టీలోని ఇతర నేతలు తనను అణగదొక్కాలని, తాను బీజేపీ పార్టీ తరఫున ప్రచారం చేస్తున్నానని ఆరోపణలు చేస్తున్నారని, తాను ఇంతవరకూ ఎన్నికల ప్రచారంలోనే పాల్గొనలేదన్నారు. తాను ఎవ్వరి తరఫున పాల్గొనబోనన్నారు. కానీ ఇక బరిలోకి దిగి కేజ్రీవాల్​, అతిషిల భరతం పడతానని నిజనిజాలను ప్రజలకు వివరిస్తానని స్వాతి మాలివాల్​ అన్నారు.