హిండెన్​ బర్గ్​ దుకాణం బంద్​?!

నాథన్​ కు తప్పని చిక్కులు
అవన్నీ కేవలం ఆరోపణలేనా?
న్యాయపరంగా చర్యలతో మూసివేత దిశగా అడుగులు
నోరుమెదపని భారత్​ లోని విపక్షాలు

నా తెలంగాణ, సెంట్రల్​ డెస్క్​: తమ ఆర్థిక ప్రాపకాన్ని పెంచుకునేందుకు ప్రయత్నిస్తూ పలుదేశాల్లోని సంస్థలు, ప్రభుత్వాలపై హిండెన్​ బర్గ్​ చేస్తున్న ఆరోపణలకు పూర్తిగా చెక్​ పడనుంది. త్వరలో హిండెన్​ బర్గ్​ దుకాణం మూసుకోనుంది. అమెరికాలో జో బైడెన్​ ప్రభుత్వానికి నూకలు చెల్లడమే ఈ సంస్థ వ్యవస్థాపకుడు నాథన్​ అండర్సన్​ కు చిక్కులు తెచ్చిపెట్టినట్లుగా భావిస్తున్నారు. 

ఇన్ని రోజులు జో బైడెన్​ ప్రభుత్వం అండతోనే ఆయా దేశాల పెద్ద పెద్ద సంస్థల ఆర్థిక వ్యవహారాలపై లేనిపోని ఆరోపణలు సృష్టిస్తూ వారి సంపద కరిగిపోయేందుకు కారణభూతంగా నిలిచారు. అదీ గాక భారత్​ కు చెందిన అదానీ ఆరోపణలపై ఇప్పటికే సెబీ ఈ సంస్థకు పలు నోటీసులు జారీ చేసింది. ఈ విషయంలో సీరియస్​ గా వ్యవహరించనున్నట్లు స్పష్టం చేసింది. భారత్​ ఆరోపణలకు మద్ధతుగా అమెరికా చట్టసభ కూడా నిలిచింది. ఆ దేశ జ్యూడిషియరీ కమిటీ సభ్యులు హిండెన్​ బర్గ్​ కు సంబంధించి న్యాయశాఖ దర్యాప్తు చేయాలని డిమాండ్​ చేశారు. 

దీంతో ఈ సంస్థ వ్యవస్థాపకుడు నాథన్​ కు విచారణ భయం చుట్టుముట్టింది. తన దుకాణం మూసుకోవడమే అన్నింటికి పరిష్కార మార్గంగా ఆయనకు కనిపిస్తున్నట్లుగా సంస్థ వర్గాల్లో గుసగుసలు బయటపడుతున్నాయి. అనేకమంది నాథన్​ సంస్థపై కేసులు నమోదు చేయాలని తాము నష్టపోయిన మొత్తం వారి నుంచే రికవరీ చేయాలని, ఆరోపణలకు స్పష్టమైన ఆధారాలను సమర్పించకుంటే ఆ సంస్థ వ్యవస్థాపకుడిని అరెస్టు చేయాలని ఇలా అనేక రకాల ఫిర్యాదులను చేశారు. ఆయా సంస్థల నివేదికలను పరిశోధన చేసి  నివేదికలు తయారు చేసి వారికి వ్యతిరేకంగా ఉన్న వారికి ఆ నివేదికలు అమ్ముకోవడమే నాథన్​ హిండెన్​ బర్గ్​ పనిగా పెట్టుకుంది. ఇన్నిరోజులకు నాథన్​ పాపం పండింది. 

కాగా సంస్థ మూసివేతపై భారత్​ లోని బీజేపీ అధికార ప్రతినిధి షహజాద్​ పూనావాలా మాట్లాడుతూ.. భారత ఆర్థిక వ్యవస్థను కొన్ని అంతర్గత దేశ దుష్టశక్తులతో కలిసి నాశనం చేయాలనుకున్నా వారి ఆశలు నెరవేరలేదన్నారు. వ్యక్తిగత లాభాలకోసం వెంపర్లాడుతూ ఆ సంస్థ తనకాళ్లను గొడ్డలితో తానే నరికివేసుకుందన్నారు. ఈ సంస్థ ఇచ్చిన నివేదికను భారత్​ లోని కొన్ని పార్టీలు తమవిగా, నిజమైన నివేదికలుగా చెప్పుకోవటం సిగ్గుచేటన్నారు. ఇప్పుడు హిండెన్​ బర్గ్​ దుకాణం మూసివేత వార్తలపై నోరుమెదపరేమని నిలదీశారు.