మహారాష్ట్రను వణికిస్తున్న భారీ వర్షాలు
లోతట్టు ప్రాంతాలు జలమయం ట్రాఫిక్ లో చిక్కుకున్న ప్రయాణికులు 60 రైళ్లు రద్దు కుప్పకూలిన రాయ్ గఢ్ నది వంతెన హై అలర్ట్ ప్రకటించిన అధికారులు
ముంబై: మహారాష్ట్రను భారీ వర్షాలు వణికిస్తున్నాయి. లోతట్టు ప్రాంతాలు జలమయమయ్యాయి. ప్రాజెక్టులు నిండుకుండల్లా మారాయి. ప్రయాణికులు ట్రాఫిక్ దిగ్భంధనంలో చిక్కుకుంటున్నారు. భారీ వర్షాలతో పలు సబ్ వేలు, రహదారులు నీటమునగడంతో ఆయా ప్రాంతాల్లో ట్రాఫిక్ ను మళ్లించారు. మరోవైపు భారీ వర్షాల నేపథ్యంలో హై అలర్ట్ జారీ చేసి ప్రజలు ఇళ్ల నుంచి బయటికి వెళ్లవద్దని అధికారులు తెలిపారు.
గురువారం కూడా మహారాష్ట్రలో భారీ వర్షాలు కురుస్తున్న నేపథ్యంలో 60 రైళ్లను రద్దు చేశారు. ట్రాక్ లు పూర్తిగా నీటిలో మునగడంతో ముందుజాగ్రత్త చర్యలు తీసుకున్నారు. పాఠశాలలు, కాలేజీలకు సెలవు ప్రకటించారు. మహారాష్ర్ట రాయ్ గఢ్ లోని నదిపై ఉన్న వంతెన కూలిపోయింది.
పూణెలో కూడా భారీ వర్షాలు కురుస్తున్నాయి. ప్రధాన రహదారులన్నీ జలమయమయ్యాయి. పలు హౌసింగ్ సొసైటీలు నీటమునిగి వేయి మంది వరకు నీటిలో చిక్కుకుపోవడంతో అధికారులు రెస్క్యూ చర్యలను చేపట్టారు.
మరోవైపు రెండు రోజులపాటు భారీ వర్షాలు కురిసే అవకాశం ఉందని ఐఎండీ అలర్ట్ జారీ చేసింది.
