బిహార్​ లో ఘోర రోడ్డు ప్రమాదం

పాట్నా: బిహార్​ గోపాల్​ గంజ్​ లో ఘోర రోడ్డు ప్రమాదం జరిగింది. ఎన్నికల విధులకు వెళుతున్న భద్రతా దళాల బస్సును ట్రక్కు ఢీ కొట్టింది. ఈ ప్రమాదంలో నలుగురు భద్రతా సిబ్బంది మృతి చెందగా 12 మందికి గాయాలయ్యాయి. అందులో ఆరుగురి పరిస్థితి విషమంగా ఉన్నట్లు స్థానిక పోలీసులు వెల్లడించారు. గోపాల్​ గంజ్​ నుంచి సుపాల్​ కు వెళుతున్న భద్రతా బలగాలకు చెందిన మూడు బస్సులు సిద్వాలియా పరిధిలో బర్హిమాలో అల్పహారం కోసం ఆపారు. ఇందులో వేగంగా వచ్చిన కంటైనర్​ ఆ బస్సులను ఢీ కొంది. దీంతో నలుగురు భద్రతా సిబ్బంది అక్కడికక్కడే మృతి చెందారు. విషయం తెలుసుకున్న గోపాల్​ గంజ్​ ఎస్పీ స్వర్ణ్​ ప్రభాత్​, డీఎం మహ్మద్​ మక్సూద్​ ఆలంలు సంఘటనా స్థలాన్ని పరిశీలించి యుద్ధ ప్రాతిపదికన సహాయక చర్యలు చేపట్టారు. గాయపడ్డవారిని స్థానిక ఆసుపత్రులకు తరలించారు. మృతి చెందిన, గాయపడిన వారంతా మూడో విడత జరిగే ఎన్నికల నిర్వహణ కోసం సుపాల్​ కు వెళుతున్నారని పోలీసులు తెలిపారు. ఈ ఘటనపై సిద్వాలియా పోలీసులు కేసు నమోదు చేసి దర్యాప్తు చేపట్టారు.