భారత్​లో ఎన్నికలు సైబర్​ దాడులకు చైనా యత్నం

న్యూఢిల్లీ: భారత్​లో జరిగే ఎన్నికలపై ప్రభావం చూపేందుకు చైనా ప్రయత్నిస్తుందని టెక్​ కంపెనీ మైక్రోసాఫ్ట్​ హెచ్చరించింది. ఆ సంస్థకు చెందిన ఇంటెలిజెన్స్​బృందం రహాస్య నివేదిక విడుదల చేసినట్లు మీడియా శనివారం స్పష్టం చేసింది. ఈ నివేదికలో పలు విస్తుగొలిపే అంశాలను పొందుపర్చింది. ఏఐ టెక్నాలజీ ద్వారా తైవాన్ ఎన్నికల్లో కూడా చైనా కుయుక్తులకు పాల్పడినట్లు వెల్లడించింది. భారత్​తో ఇప్పటికే చైనా సరిహద్దు వివాదాలపై పేచీ నెలకొంది. ఈ నేపథ్యంలో చైనా ఎన్నికల్లో ప్రస్తుత భారత ప్రభుత్వాన్ని ఇరకాటంలోకి నెట్టే ప్రమాదముందని హెచ్చరించింది. అంతేగాక ఓటర్లను తప్పుదోవ పట్టించే అవకాశం కూడా ఉందని స్పష్టం చేసింది. ఏఐ టెక్నాలజీ ద్వారా సోషల్​ మీడియా మాధ్యమంగా ఇప్పటికే పలు బృందాలు రంగంలోకి దిగినట్లు మైక్రోసాఫ్ట్​స్పష్టం చేసింది. చైనాకు మద్దతు పలుకుతున్న సైబర్​ గ్రూపులు ఉత్తరకొరియాతోపాటు 2024లో ఎన్నికలు జరుగుతున్న అనేక దేశాలను లక్ష్యాలుగా చేసుకునే వ్యూహాన్ని ప్రయోగిస్తున్నట్లు స్పష్టం చేసింది. 63 దేశాల్లో జరిగే ఎన్నికలపై చైనా సైబర్​ గ్రూపులను ఉసిగొలిపే అవకాశం ఉన్నట్లు స్పష్టం చేసింది. ప్రపంచవ్యాప్తంగా 49 శాతం ఓటర్లు ఓటు హక్కు వినియోగించుకోనున్న నేపథ్యంలో అసత్యవార్తలు ప్రభావం చూపిస్తాయని పేర్కొంది. ప్రస్తుతానికి ఏఐ టెక్నాలజీ ప్రభావం తక్కువగా అనిపిస్తున్నా భవిష్యత్​లో ఈ ప్రభావం ఎక్కువగా ఉంటుందని మైక్రోసాఫ్ట్​ పేర్కొంది.