టిబెట్​ లో భూకంపం 53 మంది మృతి, 62 మందికి గాయాలు

7.1 తీవ్రత, నేపాల్​, భూటాన్​, సిక్కిం, ఉత్తరాఖండ్​ లలోనూ ప్రభావం

టిబెట్​: చైనా టిబెట్​ ప్రాంతంలో భారీ భూకంపం సంభవించింది. రిక్టర్​ స్కేల్​ పై తీవ్ర 7.1గా నమోదైంది. దీంతో 53 మంది మృతిచెందగా, 62 మందికి తీవ్ర గాయాలయ్యాయి. మంగళవారం తెల్లవారుజామున భూకంపం సంభవించడంతో భారీ ప్రాణనష్టం జరిగింది. నేపాల్​, భూటాన్​, సిక్కిం, ఉత్తరాఖండ్​ లలో కూడా దీని ప్రభావం భారీగా పడింది. అధికారిక సమాచారం ప్రకారం భూకంపం 9.05 గంటలకు సంభవించింది. టిబెట్​ లోని షిజాంగ్​ లో 10కి.మీ.లోతున భూకంపం కేంద్రం ఉన్నట్లుగా అధికారులు గుర్తించారు. భారత్​ లోనూ పలు ప్రాంతాల్లో భూకంపం సంభవించినా ఆ మేర తీవ్రత లేకపోవడంతో పెను ప్రమాదం తప్పింది. ప్రాణ, ఆస్థి నష్టం జరగలేదు. భూకంపం వచ్చిన వెంటనే ఆయా దేశాల్లోని ప్రజలు ఇళ్ల నుంచి బయటికి పరుగులు పెట్టారు. సీసీ టీవీల్లో భూకంప కదలికలు స్పష్టంగా రికార్డయ్యాయి. చైనా స్టేట్​ కౌన్సిల్​ భూకంప ప్రభావిత ప్రాంతానికి ప్రత్యేక అధికారులతో కూడిన టాస్క్​ ఫోర్స్​ బృందాన్ని పంపించి వారి సూచన మేరకు ఎమర్జెన్సీని ప్రకటించింది. ఈ భూకంపం ప్రభావం భూకంప కేంద్రం నుంచి 400కి.మీ. వరకు ఉన్నట్లు అధికారులు అంచనా వేశారు. గత ఐదేళ్లలో చైనా టిబెట్​ లో నమోదైన భూకంపాల్లో ఇదే అత్యంత శక్తివంతమైనదిగా అధికారులు ప్రకటించారు. ఈ భూకంప కేంద్రం భారత్​–యురేషియన్​ టెక్టోనిక్​ ప్లేట్లు ఢీకొన్న ప్రదేశంలో ఉన్నట్లుగా శాస్ర్తవేత్తలు తేల్చారు.