లాలూ పాలనలో మహిళలపై వివక్ష

పాట్నా: లాలూ పాలనలో రాత్రిపూట మహిళలు బయటకు వెళ్లే పరిస్థితులు ఉండేవా? అని బిహార్​ సీఎం నితీశ్​ కుమార్​ లాలూ (ఆర్జేడీ)పై విరుచుకుపడ్డారు. ఆదివారం ఓ కార్యక్రమం సందర్భంగా ఆర్జేడీపై విమర్శల వర్షం కురిపించారు. ప్రస్తుతం మహిళలకు బిహార్​ లో ఏ విధమైన స్వేచ్ఛ ఉందో చూడాలన్నారు. విద్య, వైద్యం, వ్యాపారం లాంటి వాటిలో వారిని భాగస్వాములుగా చేశామన్నారు. ఇటీవల నితీశ్​ కుమార్​ ఆర్జేడీ, ఇండికూటమితో కలిసి వెళతారని అసత్య ప్రచారాలు సృష్టిస్తున్నారని మండిపడ్డారు. రెండుసార్లు వారితో కలిసి వెళ్లింది చాలని ఇక వారితో ప్రయాణించలేనని కుండబద్ధలు కొట్టారు. ఎన్డీయేతోనే తమ ప్రయాణమని స్పష్టం చేశారు. తమ ప్రభుత్వం 2005 తరువాత హిందూ-ముస్లిం, ఫార్వర్డ్-బ్యాక్‌వర్డ్, దళిత్-మహాదళిత్ సహా అన్ని వర్గాల అభివృద్ధి కోసం పనిచేశామని అన్నారు. ప్రస్తుతం బిహార్​ లో ఎన్నో రకాల సంక్షేమ పథకాలను విజయవంతంగా అమలు చేసిన ఘనత తమదేనని నితీశ్ కుమార్​ అన్నారు.