జేఏఎల్​ పై సైబర్​ అటాక్​

టోక్యో: జపాన్ ఎయిర్‌లైన్స్ (జేఏఎల్)పై భారీ సైబర్ దాడి జరిగింది. దీంతో వందలాది విమానాల రాకపోకలు నిలిచిపోయాయి. పలు విమానాలు ఆలస్యంగా నడిచాయని జపాన్ ఎయిర్‌లైన్స్ తెలిపింది. గురువారం ఉదయం జపాన్​ ఎయిర్​ లైన్స్​ నెట్‌వర్క్ పై సైబర్​ దాడి జరిగిందని అధికారులు ఆందోళన వ్యక్తం చేశారు. టిక్కెట్లు, విమాన సీట్లు తదితర వివరాలను ఆన్​ లైన్​ ద్వారా పంచుకునే డేటా కొన్ని గంటలపాటు నిలిచిపోయింది. దీంతో అప్రమత్తమైన ఎయిర్​ లైన్స్​ అధికారులు సాంకేతిక నిపుణుల ద్వారా సమస్యను కొన్ని గంటల్లో పరిష్కరించారు. దీంతో ఎయిర్​ లైన్స్​ సేవలు యథాతథంగా నడిచాయి. కాగా ఈ సైబర్​ దాడిలో ఎలాంటి వైరస్​ గుర్తించలేదని, కస్టమర్ల డేటా లీక్​ కాలేదని జేఏఎల్​ తెలిపింది. జపాన్​ కు చెందిన ప్రభుత్వ రంగ సంస్థలపై తరచూ సైబర్​ అటాక్​ లు ఆందోళన కలిగిస్తున్నాయి. 2023లో జపాన్​ అంతరిక్ష సంస్థ, ఓడరేవులపై సైబర్​ దాడులు జరిగాయి. దీంతో మూడురోజులపాటు పలు సేవలు నిలిచిపోయాయి. 

కాగా క్రిస్మస్​ పర్వదినానికి ముందు 24న అమెరికన్​ ఎయిర్​ లైన్స్​ పై కూడా భారీ సైబర్​ దాడి జరిగింది. దీంతో కొన్ని గంటలపాటు అమెరికన్​ ఎయిర్​ లైన్స్​ కు చెందిన అన్ని విమాన సేవలకు అంతరాయం కలిగింది. ఈ రెండు దాడులపై అమెరికా, జపాన్​ సాంకేతిక నిపుణులు దర్యాప్తు ముమ్మరం చేశారు.