కొనసాగనున్న బీజేపీ హవా 

నా తెలంగాణ, సెంట్రల్​ డెస్క్​: 2024 లోక్‌సభ ఎన్నికల తొలి దశలో 21 రాష్ట్రాలు, కేంద్రపాలిత ప్రాంతాల్లోని 102 స్థానాలకు శుక్రవారం, ఏప్రిల్ 19న పోలింగ్ జరగనుంది. 2019లో బీజేపీ అత్యధికంగా 40, డీఎంకే 24, కాంగ్రెస్‌ 15 సీట్లు గెలుచుకున్నాయి. ఇతరులకు 23 సీట్లు వచ్చాయి. ఈసారి బీజేపీ మరింత పట్టుసాధించడంలో అత్యధిక స్థానాలను బీజేపీ కైవసం చేసుకునే అవకాశం ఉందని విశ్లేషకులు పేర్కొంటున్నారు.

ఎన్నికల సంఘం ప్రకారం, మొదటి దశ ఎన్నికల్లో మొత్తం 1,625 మంది అభ్యర్థులు బరిలో ఉన్నారు, వీరిలో 1,491 మంది పురుషులు, 134 (8శాతం) మంది మహిళా అభ్యర్థులు. 

అసోసియేషన్ ఫర్ డెమోక్రటిక్ రిఫార్మ్ (ఏడీఆర్) 1,618 మంది అభ్యర్థుల అఫిడవిట్లలో అందించిన సమాచారంపై నివేదికను సిద్ధం చేసింది. వీరిలో 16% మంది అంటే 252 మంది అభ్యర్థులపై క్రిమినల్ కేసులు నమోదయ్యాయి.కాగా, 450 మంది అంటే 28% మంది అభ్యర్థులు కోటీశ్వరులు. కోటి లేదా అంతకంటే ఎక్కువ విలువైన ఆస్తులున్నాయి. 10 మంది తమ ఆస్తులను జీరోగా ప్రకటించగా, ముగ్గురికి రూ.300 నుంచి రూ.500 మాత్రమే ఆస్తులుండడం గమనార్హం. 161 (10 శాతం) మంది అభ్యర్థులపై హత్య, కిడ్నాప్ వంటి తీవ్రమైన కేసులు నమోదయ్యాయి. ఏడుగురు అభ్యర్థులపై హత్య, 19 మందిపై హత్యాయత్నం కేసులు ఉన్నాయి. 18 మంది అభ్యర్థులపై మహిళలపై నేరాలకు సంబంధించి కేసులు నమోదయ్యాయి. వీరిలో ఒకరిపై అత్యాచారం కేసు కూడా నమోదైంది. అదే సమయంలో, 35 మంది అభ్యర్థులపై ద్వేషపూరిత ప్రసంగాలకు సంబంధించిన కేసులు నమోదయ్యాయి.

తొలి దశ ఎన్నికల్లో 9 హాట్ సీట్లు...
నాగ్‌పూర్ (మహారాష్ట్ర): ఆర్‌ఎస్‌ఎస్ ప్రధాన కార్యాలయం అయినప్పటికీ, నాగ్‌పూర్ ఎప్పుడూ కాంగ్రెస్‌కు కంచుకోటగా ఉంది. ఈ స్థానం 1952 నుంచి 1996 వరకు, 1998 నుంచి 2009 వరకు కాంగ్రెస్ ఆధీనంలో ఉంది. 1996 ఎన్నికల్లో తొలిసారి బీజేపీ ఖాతా తెరిచింది. అప్పుడు బన్వరీలాల్ పురోహిత్ ఎంపీగా ఎన్నికయ్యారు. 2014లో కాంగ్రెస్ విజయ పరంపరకు నితిన్ గడ్కరీ బ్రేక్ వేశారు. అప్పటి నుంచి ఆయన నాగ్‌పూర్‌ ఎంపీగా కొనసాగుతున్నారు. గడ్కరీ ఇప్పుడు మూడోసారి ఎన్నికల బరిలో నిలిచారు. మోదీ నేతృత్వంలో ముచ్చటగా మూడోసారి హ్యాట్రిక్​ సాధించనున్నారనే వాదలున్నాయి.

బికనీర్ (రాజస్థాన్): ఈసారి కూడా రాజస్థాన్‌లోని బికనీర్‌లో బీజేపీ ప్రస్తుత న్యాయశాఖ మంత్రి అర్జున్‌రామ్ మేఘ్‌వాల్‌ను అభ్యర్థిగా నిలబెట్టింది. ఆయనపై రాజస్థాన్ ప్రభుత్వంలో మంత్రిగా పనిచేసిన గోవింద్రామ్ మేఘ్వాల్‌ను కాంగ్రెస్ రంగంలోకి దించింది. గోవింద్‌రామ్ మేఘవాల్ ఇటీవలే ఖాజువాలా స్థానం నుంచి అసెంబ్లీ ఎన్నికల్లో ఓడిపోయారు. అర్జున్‌రామ్ మేఘవాల్ ఈ స్థానం నుంచి వరుసగా 3 సార్లు ఎంపీగా ఉన్నారు. నాలుగోసారి కూడా ఈయన గెలుపును సాధించేందుకు సిద్ధంగా ఉన్నారు.

అల్వార్ (రాజస్థాన్): అల్వార్‌లో బీజేపీ అభ్యర్థి భూపేంద్ర యాదవ్‌, కాంగ్రెస్‌ అభ్యర్థి లలిత్‌ యాదవ్‌ మధ్య పోటీ నెలకొంది. లలిత్ యాదవ్ ముండావర్ ఎమ్మెల్యే. 2023 అసెంబ్లీ ఎన్నికల్లో 50 వేలకు పైగా ఓట్లతో గెలుపొందారు. అదే సమయంలో, భూపేంద్ర యాదవ్ రాజస్థాన్ నుంచి రెండుసార్లు రాజ్యసభ ఎంపీగా ఉన్నారు. 2019 లోక్‌సభ ఎన్నికల్లో బీజేపీకి చెందిన బాబా బాలక్‌నాథ్ అల్వార్ స్థానాన్ని గెలుచుకున్నారు. ఈసారి బీజేపీ అభ్యర్థి భూపేంద్ర యాదవ్​ ఇక్కడి నుంచి విజయం సాధించనున్నారనే టాక్​ వినబడుతోంది.

చింద్వారా (మధ్యప్రదేశ్): ఈ సీటు 70 ఏళ్లకు పైగా కాంగ్రెస్‌లో ఉంది. గత 45 ఏళ్లుగా ఇక్కడ నాథ్ కుటుంబానికి చెందిన ఒకరు గెలుస్తూ వస్తున్నారు. అయితే 1997లో జరిగిన ఉప ఎన్నికలో అప్పటి రాష్ట్ర ముఖ్యమంత్రి సుందర్‌లాల్ పట్వా కమల్‌నాథ్‌పై 37 వేలకు పైగా ఓట్లతో విజయం సాధించారు. దీని తర్వాత, మరుసటి సంవత్సరం కమల్ నాథ్ కూడా పట్వాను భారీ తేడాతో ఓడించారు. కమల్ నాథ్ 1980 నుంచి 2019 మధ్య 9 సార్లు ఇక్కడ ఎంపీగా ఉన్నారు. 2018లో ముఖ్యమంత్రి అయ్యాక కుమారుడికి కమాండ్‌ అప్పగించి 2019లో మోడీ వేవ్‌ ఉన్నా నకుల్‌నాథ్‌ ఈ ఎంపీ సీటును కైవసం చేసుకున్నారు. ఈసారి కూడా కాంగ్రెస్‌ అభ్యర్థి నకుల్‌నాథ్‌, బీజేపీ అభ్యర్థి వివేక్‌ బంటీ సాహు మధ్యే పోటీ నెలకొంది. ఈసారి ఆ వేవ్​ ను పూర్తిగా మార్చి హస్తాన్ని ఓడించాలనే గట్టి పట్టుదలతో వివేక్​ ఉన్నారు. మోదీ నేతృత్వంలోని విజయాన్ని సాధించాలని గట్టి ప్రచారాన్ని నిర్వహించారు.

మాండ్లా (మధ్యప్రదేశ్): బీజేపీ ఇక్కడ నుంచి ఆరు సార్లు ఎంపీగా, కేంద్ర మంత్రిగా ఎన్నికైన ఫగ్గన్ సింగ్ కులస్తే పోటీ చేశారు. నాలుగుసార్లు కాంగ్రెస్ ఎమ్మెల్యేగా గెలిచిన ఓంకార్ సింగ్ మార్కంపై ఆయన పోటీ చేస్తున్నారు. 

ఉధంపూర్ (జమ్మూ-కాశ్మీర్): జమ్మూ కాశ్మీర్‌లోని ఉధంపూర్-దోడా లోక్‌సభ స్థానం నుంచి కేంద్ర మంత్రి డాక్టర్ జితేంద్ర సింగ్ మూడోసారి ఎన్నికల బరిలో నిలిచారు. 2014లో జమ్మూ కాశ్మీర్ మాజీ ముఖ్యమంత్రి గులాం నబీ ఆజాద్‌పై 61 వేల ఓట్లతో విజయం సాధించారు. దీని తర్వాత 2019లో కాంగ్రెస్ అభ్యర్థి విక్రమ్ ఆదిత్య సింగ్ 3 లక్షలకు పైగా ఓట్ల తేడాతో ఓడిపోయారు. 2024 ప్రస్తుత ఎన్నికల్లోనూ మంత్రి జితేంద్ర హ్యాట్రిక్​ సాధిస్తారనే నమ్మకంతో ఉన్నారు.

అరుణాచల్ వెస్ట్: ఈ స్థానంలో బీజేపీ కేంద్ర మంత్రి కిరణ్ రిజిజును బరిలోకి దింపింది. ఆయనకు కాంగ్రెస్ అధ్యక్షుడు నబమ్ తుకీ సవాల్ విసిరారు. టుకీ అరుణాచల్ ప్రదేశ్ మాజీ ముఖ్యమంత్రి, పాపం పరే జిల్లాలోని సాగాలి అసెంబ్లీ స్థానం నుంచి 6 సార్లు ఎన్నికయ్యారు. ఈసారి రిజిజు అరుణాచల్​ ను గెలిచి బీజేపీ నూతన పాలనకు నాందీ పలకనున్నారనే భావిస్తున్నారు. 2014, 2019 లోక్‌సభ ఎన్నికల్లో బీజేపీ అభ్యర్థి కిరణ్ రిజిజు ఈ స్థానంలో విజయం సాధించారు.

కూచ్ బెహార్ (పశ్చిమ బెంగాల్): ఈ స్థానం నుంచి బీజేపీ కేంద్ర మంత్రి నిషిత్ ప్రమాణిక్‌ను బరిలోకి దించగా, జగదీష్ చంద్ర బర్మా బసునియాపై టీఎంసీ నుంచి రంగంలో ఉన్నారు. 2019లో కూచ్ బెహార్ స్థానం నుంచి బీజేపీ అభ్యర్థి నిషిత్ ప్రమాణిక్ ఎంపీగా ఎన్నికయ్యారు. ఈసారి కూడా ఈయన విజయం నల్లేరుపై నడకేనంటున్నారు. కాగా నిషిత్​ టీఎంసీ నేత ఆ పార్టీల నుంచి విడివడి బీజేపీ నుంచి పోటీచేస్తున్నారు. స్థానికంగా ఈయనకుప్రజల్లో మంచి కీర్తి ప్రతిష్ఠలు ఉండడంతో ఈయన గెలుపు సునాయాసమేనంటున్నారు. 

నగీనా (ఉత్తర ప్రదేశ్): యూపీలోని బిజ్నోర్ జిల్లా నగీనా లోక్‌సభ స్థానం ఈసారి హైప్రొఫైల్‌గా మారింది. ఇక్కడ దళిత యువ నాయకుడు చంద్రశేఖర్ ఆజాద్ తన పార్టీ 'ఆజాద్ సమాజ్ పార్టీ' నుంచి ఎన్నికల్లో పోటీ చేస్తున్నారు. దీంతో ఈ సీటుపై పోటీ చతుర్ముఖంగా మారింది. బీజేపీ తరఫున నహ్తౌర్ ఎమ్మెల్యే ఓం కుమార్, ఇండియా అలయన్స్ తరఫున మాజీ న్యాయమూర్తి మనోజ్ కుమార్ బరిలో ఉన్నారు.ఈ స్థానంపై మాత్రం చదుర్ముఖ పోటీ తప్పేట్లుగా లేదనే వాదన ఉంది. 

తొలి విడత ఎన్నికలు..
తమిళనాడులోని 39 నియోజకవర్గాల్లో ఓటింగ్​ కొనసాగనుంది. రాజస్థాన్​ లో 12, ఉత్తరప్రదేశ్​ 8, మధ్యప్రదేశ్​ 6, మహారాష్ర్ట 5, అసోం 5, ఉత్తరాఖండ్​ 5, బిహార్​ 4, పశ్చిమ బెంగాల్​ 3, మేఘాలయ 2, అరుణాచల్​ ప్రదేశ్​ 2, మణిపూర్​ 2, పాండిచ్ఛేరి 1, మిజోరం 1, చత్తీస్​ గడ్​ 1, జమ్మూకశ్మీర్​ 1, లక్ష్యద్వీప్​ 1, త్రిపుర 1, సిక్కిం 1, నాగాలాండ్​ 1, అండమాన్​ అండ్​ నికోబార్​ 1 స్థానంపై ఎన్నికలు శుక్రవారం జరగనున్నాయి.