అరుదైన శస్త్రచికిత్సలో ఎయిమ్స్​ వైద్యులు విజయవంతం

నా తెలంగాణ, న్యూ ఢిల్లీ: పొట్టభాగంలో రెండు కాళ్లతో బతుకీడుస్తున్న బాలునికి న్యూ ఢిల్లీలోని ఎయిమ్స్​ వైద్యులు విజయవంతంగా ఆపరేషన్​ చేసి కాళ్లను తొలగించారు. ఈ శస్త్రచికిత్స అత్యంత క్లిష్టమైనదిగా వైద్యులు తెలిపారు. బుధవారం ఈ ఆపరేషన్​ కు సంబంధించిన వివరాలను మీడియాకు విడుదల చేశారు. అరుదైన జన్యుపరం లోపం కారణంగా ఈ బాలుడికి పుట్టుకతోనే కడుపు భాగంలో రెండు కాళ్లు వచ్చాయి. యూపీకి చెందిన 17 ఏళ్ల బాలుడిని పరీక్షించిన ఎయిమ్స్​ సర్జరీ విభాగం అదనపు ప్రొఫెసర్​ డాక్టర్​ అసూరి కృష్ణ శస్త్రచికిత్స ద్వారా విజయవంతంగా ఆ భాగాన్ని తొలగించగలిగారు. ప్రపంచవ్యాప్తంగా ఇలాంటి కేసులో 42 మాత్రమే నమోదయ్యాయని చెప్పారు. ఈ లోపం కారణంగా బాలుడిలో ఎదుగుదల లోపం ఏర్పడిందన్నారు. భవిష్యత్​ లో ఇతర అవయవాలు కూడా దెబ్బతినే అవకాశం ఏర్పడిందన్నారు. ఈ బాలుడు 8వ తరగతి విద్యనభ్యసిస్తూ తోటి బాలల చేత ఎగతాళికి గురై చదువు కూడా మధ్యలోనే ఆపివేశాడన్నారు. కుటుంబీకులు న్యూ ఢిల్లీలోని ప్రిమియర్​ ఆసుపత్రిని సంప్రదించారని తెలిపారు. ఆసుపత్రి వర్గాలు తమను సంప్రదించాయని బాలునికి అన్ని రకాల వైద్య పరీక్షలు నిర్వహించిన అనంతరం శస్త్రచికిత్స ద్వారా లోపాన్ని నివారించవచ్చని గుర్తించామని డా. అసూరి కృష్ణ తెలిపారు. శస్త్రచికిత్స విజయవంతం కావడం అరుదైనదని పేర్కొన్నారు.