మణిపూర్ లో సాధారణ పరిస్థితులకు కట్టుబడే చర్యలు
రాజ్యసభలో కేంద్రమంత్రి నిర్మలా సీతారామన్
ఇంఫాల్: మణిపూర్ లో సాధారణ పరిస్థితులు తీసుకువచ్చేందుకు కేంద్రం కట్టుబడి ఉందని కేంద్ర ఆర్థిక శాఖ మంత్రి నిర్మలా సీతారామన్ అన్నారు. రాజ్యసభలో ప్రస్తుత ఆర్థిక సంవత్సరానికి మణిపూర్ బడ్జెట్ ఆమోదం, 2025–26 ఆరు నెలలకు ఓట్ ఆఫ్ అకౌంట్ పై జరిగిన చర్చకు సమాధానం ఇచ్చారు. నిందలు వేయడం మానుకోవాలని మణిపూర్ లో శాంతి కోసం ప్రతిపక్ష పార్టీలు మద్ధతు ఇవ్వాలని కోరారు. ప్రధాని సందర్శించలేదన్న ప్రతిపక్షాల విమర్శలను సైతం తిప్పికొట్టారు. గతంలో ప్రధానులు ఎవరైనా అక్కడ హింస జరిగితే అక్కడికి వెళ్లారా అని ప్రశ్నించారు. పీవి నరసింహారావు, ఐకె గుజ్రాల్ పేర్లను ఉదహరించారు. మణిపూర్ లో ఇప్పటికే కేంద్ర ప్రభుత్వం చేయాల్సిందంతా చేస్తుందని భద్రత, ఇరువర్గాలతో చర్చలు, శాంతి నెలకొల్పేందుకు పకడ్బందీ ఏర్పాట్లు, అన్ని రకాల చర్యలు చేపడుతుందని నిర్మలా సీతారామన్ అన్నారు. అంతేగాక ఆ ప్రాంత అభివృద్ధికి కీలకమైన చర్యలు తీసుకుంటుందని చెప్పారు. ఆ ప్రాంతంలో ప్రతీ ఒక్కరు శాంతి నెలకొల్పడంలో కేంద్రంతో కలిసి రావాలని అన్నారు.
