కుంభమేళా @ 61.44 కోట్లు

నా తెలంగాణ, న్యూ ఢిల్లీ: ప్రయాగ్​ రాజ్​ మహాకుంభమేళా శనివారం అర్థరాత్రి నుంచే రోడ్లన్నీ ఫుల్​ అయిపోయాయి. ఆదివారం ప్రయాగ్​ రాజ్​ కు రావాల్సిన 67 రైళ్లు రద్దయ్యాయి. ఆదివారం బ్రహ్మముహూర్తం వేకువజాము 3 గంటల నుంచి మధ్యాహ్నం 12 గంటల వరకు 70 లక్షల మంది భక్తులు పుణ్య స్నానాలాచరించారు. దీంతో 42వ రోజు మధ్యాహ్నానికి స్నానాలాచరించిన వారి సంఖ్య 61.44 కోట్లకు చేరిందని అధికారులు తెలిపారు. ఇక ప్రయాగ్​ రాజ్​ రైల్వేస్టేషన్లన్నీ కిటకిటలాడుతుండగా, విమానాశ్రయంలోనూ భారీ రద్దీ ఏర్పడింది. కాఫీ, టీల కోసం కూడా గంటపాటు వేచి ఉండాల్సి రావడం విశేషం. విమానాశ్రయానికి వస్తున్న వాహనాలను, ప్రయాణికులను బయట పార్కింగ్​ వద్దే నిలిపివేశారు. మూడు గంటల ముందు ఎయిర్​ పోర్ట్​ కు వచ్చిన వారికే ప్రవేశం కల్పిస్తున్నారు. అన్ని విమానాల్లో టికెట్లు బుకింగ్​ అయిపోవడంతో అప్పటికప్పుడు వెళ్లాల్సిన ప్రయాణికులకు నిరీక్షణ తప్పడం లేదు. 26 మహాశివరాత్రి నాటికి పుణ్య స్నానాలు ఆచరించే వారి సంఖ్య 65కోట్లు దాటుతుందని అధికారులు అంచనా వేస్తున్నారు. భారీ రద్దీ దృష్ట్యా ప్రయాగ్​ రాజ్​ కు దారితీసే ఏడు ఎంట్రీ పాయింట్ల వద్ద ఒక్కో ఐజీని, భద్రతా బలగాలను నియమించారు.