కుంభమేళాలో అగ్నిప్రమాదం సిలీండర్​ పేలి 19 టెంట్లు దగ్ధం

రెస్క్యూ చర్యలను చేపట్టిన ఎన్డీఆర్​ఎఫ్​ బృందాలు
16 ఫైరింజన్లతో మంటలు ఆర్పే యత్నం

లక్నో: ప్రయాగ్​ రాజ్​ కుంభమేళాలో అపశృతి చోటు చేసుకుంది. తాత్కాలికంగా ఏర్పాటు చేసిన టెంట్​ లో ఆదివారం గ్యాస్​ సిలీండర్​ పేలి మంటలంటుకున్నాయి. చూస్తూ ఉండగానే మంటలు వ్యాపిస్తుండడంతో అక్కడే ఉన్న సిబ్బంది మంటలను ఆర్పేందుకు ప్రయత్నిస్తూనే సమాచారాన్ని ఉన్నతాధికారులకు అందజేశారు. దీంతో ఫైర్​ చీఫ్​ ఆఫీసర్​ ప్రమోద్​ వర్మ రంగంలోకి దిగి ఒక్కసారిగా ఫైరింజన్లు, భారీ ఎత్తున సిబ్బందిని సంఘటనా స్థలంలోకి రప్పించి మంటలను ఆర్పే ప్రయత్నాలను ముమ్మరం చేశారు. కుంభమేళా సెక్టార్​–5 శాస్ర్తి, రైల్వే బ్రిడ్జిల మధ్య ఈ ప్రమాదం జరిగిందన్నారు. ఎన్డీఆర్​ ఎఫ్​ బృందాలు పరిసర ప్రాంతాలను ఖాళీ చేయించి సహాయక చర్యలను ముమ్మరం చేశారు. అగ్నిప్రమాదం సందర్భంగా 18 నుంచి 19 టెంట్​ లకు మంటలు వ్యాపించాయి. కాగా ఈ ఘటనలో ఎలాంటి ప్రాణ నష్టం వాటిల్లలేదని అధికారులు ప్రకటించారు. మంటలను అదుపు చేసేందుకు 16 ఫైరింజన్లను రప్పించారు.