సైఫ్​ పై దాడి మరో నిందితుడి అరెస్ట్​

రంగంలోకి 35 బృందాలు 
కరీనా వాంగ్మూలం నమోదు
మెరుగుపడుతున్న సైఫ్​ ఆరోగ్యం
సోషల్​ మాధ్యమంగా చిలువలు పలువలుగా వార్తలు
నమ్మొద్దంటున్న పోలీసులు

ముంబాయి: సైఫ్​ అలీఖాన్​ పై దాడి కేసులో నిందితుడి కోసం పోలీసులు తీవ్రంగా గాలిస్తున్నారు. శుక్రవారం అదుపులోకి తీసుకున్న నిందితుడు షాహీద్​ కు ఈ దాడితో సంబంధం లేదని పోలీసుల విచారణలో తేలింది. ఈ నేపథ్యంలో శనివారం సీసీ ఫుటేజీల ద్వారా ఆ ప్రాంతంలో తచ్చాడిన మరో వ్యక్తిని పోలీసులు మధ్య ప్రదేశ్​ నుంచి అదుపులోకి తీసుకున్నారు. అనుమానితుడిని విచారిస్తున్నారు. దాడి కేసులో నిందితులను అరెస్టు చేసేందుకు ముంబాయి పోలీసులు ఇప్పటికే 35 బృందాలను రంగంలోకి దింపారు. నిందితుడు ముంబాయిలోని బాంద్రా పోలీస్​ స్టేషన్​, రైల్వే స్టేషన్​ వద్ద కనిపించాడు. నిందితుడిని పోలీసులు విచారిస్తున్నారు.

మరోవైపు కరీనా కపూర్​ వాంగ్మూలాన్ని కూడా పోలీసులు నమోదు చేశారు. నిందితుడు అక్కడ ఉన్న నగలను వదిలేశాడని, సైఫ్​ వెళ్లకుంటే పిల్లలకు ప్రమాదం ఏర్పడే అవకాశం ఉండేదని, తాను చాలా భయపడినట్లు కరీనా పోలీసుల వాంగ్మూలంలో పేర్కొంది. ప్రస్తుతం లీలావతి ఆసుపత్రిలో చికిత్స పొందుతున్న సైఫ్​ ఆరోగ్యం మెరుగుపడినట్లు వైద్యులు వెల్లడించారు. రెండు, మూడు రోజుల్లో ఆయనను డిశ్చార్జీ చేస్తామని ప్రకటించారు.
 
కాగా సైఫ్​ పై దాడి అండర్​ వరల్డ్​, కుట్రకోణమని, ఇంట్లో పనివారి పనేనని, శత్రువుల పని అని సోషల్​ మీడియాలో చిలువలు పలువలుగా వార్తలు వస్తున్నాయి. పోలీసులు మాత్రం వీటన్నింటినీ కొట్టి పడేస్తున్నారు. పూర్తి విచారణ అనంతరమే అన్ని విషయాలను స్పష్టం చేయగలమని తెలిపారు. అంతవరకూ సామాజిక మాధ్యమాల్లో వచ్చే వార్తలు నిజమని నమ్మవద్దని విజ్ఞప్తి చేశారు.