యోగాతో గుండెజబ్బులు దూరం

నా తెలంగాణ, న్యూ ఢిల్లీ: యోగాతో రక్తపోటు తగ్గుతుందని, పలు రకాల రుగ్మతలను దూరం చేసుకోవచ్చని సీఐఎంఆర్​ (సెంట్​ ఫర్​ ఇంటిగ్రేటెడ్​ మెడిసిన్​ అండ్​ రీసెర్చ్​) ప్రొఫెసర్​ డాక్టర్​ గౌతమ్​ శర్మ స్పష్టం చేశారు. న్యూ ఢిల్లీలో ‘ఇంటిగ్రేటెడ్​ మెడిసిన్​ పురోగతి’ అనే అంశంపై జరిగిన సమావేశంలో ఆదివారం మీడియాతో మాట్లాడారు. పరిశోధనలో నాడీ, గుండె సంబంధిత వ్యాధులను యోగా నివారిస్తుందని చెప్పారు. మైగ్రేన్​ ను కూడా తగ్గిస్తుందన్నారు. తమ పరిశోధనలో యోగా చేస్తున్న పలువురిని, చేయని వారి ఆరోగ్య పరిస్థితులను పరిశీలించి ఈ విషయాలను గుర్తించామన్నారు. పరిశోధనలోని అంశాలు ఆసక్తిని రేకెత్తించాయన్నారు. ఆయా పరిశోధనల్లోని అంశాలు శాస్త్రీయంగా కూడా రూఢీ చేసుకున్నట్లు వివరించారు. యోగా చేయడం అంటే యాడ్​ ఆన్​ థెరపీ అని రోగుల జీవన నాణ్యతను పెంపొందిస్తుందని అన్నారు. ప్రొఫెసర్​ గౌతమ్​ శర్మను పరిశోధనల ఫలితాలను వివరించేందుకు యూరోపియన్​ సొసైటీ ఆఫ్​ కార్డియాలజీ, అమెరికన్​ హార్ట్​ రిథమ్​ సొసైటీలు ఆహ్వానించాయి. ఈ రెండు వైద్య విభాగాలు యోగాపై మరిన్ని పరిశోధనలకు ఆసక్తిని వ్యక్తం చేయడం గమనార్హం.