ఓట్ల కోసమే నీటి బిల్లులు మాఫీ

నా తెలంగాణ, న్యూ ఢిల్లీ: ఓట్లు రాబట్టుకొనేందుకు నీటి బిల్లులు మాఫీ అని సీఎం కేజ్రీవాల్​ మభ్యపెడుతున్నారని, ఇంతకాలం నీటి బిల్లులు ఎందుకు మాఫీ చేయలేదని ఢిల్లీ బీజేపీ అధ్యక్షుడు వీరేంద్ర సచ్​ దేవా ప్రశ్నించారు. ఢిల్లీలో అధికారంలో ఉంటూ ఎన్నికలకు ముందు ప్రజలను మభ్యపెట్టేందుకు ప్రయత్నిస్తున్నారని ఆరోపించారు. ఢిల్లీలో బీజేపీకి పెరుగుతున్న మద్ధతును చూసి ఆప్​ భయపడుతుందన్నారు. అందుకే తమ ప్రాబల్యాన్ని తగ్గించేందుకే కుటీల యత్నాలకు తెరతీశారన్నారు. కేజ్రీవాల్​ చెబుతున్నవన్నీ అసత్యాలేనన్నారు. ఢిల్లీలో నీరు దొరికే పరిస్థితి ఉందా? అని ప్రశ్నించారు. కుళాయి నీటిలో మురికి నీరు వస్తుందని జలబోర్డుకు ఫిర్యాదు చేస్తే పట్టించుకోని కేజ్రీవాల్​ బిల్లుల మాఫీపై ప్రకటిస్తూ తన దుర్నితిని చాటుకున్నారని మండిపడ్డారు. బిల్లులు మాఫీ చేయాలనుకుంటే ఈ రోజు నుంచే చేయాలని సవాల్​ విసిరారు. మాఫీపై ప్రవర్తనా నియమావళి విధించారో లేదో చెప్పాలని నిలదీశారు. కాంగ్రెస్​, ఆప్​ బీజేపీని ఓడించేందుకు ఒకసారి ప్రయత్నించి విఫలమయ్యాయని పేర్కొన్నారు. ఇప్పుడు ఈ రెండు పార్టీలు విడివిడిగా పోటీ చేస్తూ ఢిల్లీ ప్రజల నిర్ణయాన్ని విడగొట్టాలనుకుంటున్నాయని ఈ విషయాన్ని ప్రజలు గమనించి ఈ రెండు పార్టీలను తిప్పికొడతారని సచ్​ దేవా అన్నారు.