మహా అఘాడిలో సీట్ల పంపిణీ కొలిక్కి

ముంబాయి: మహావికాస్​ అఘాడిలో కూడా సీట్ల పంపిణీ కొలిక్కి వచ్చింది. ఢిల్లీ, ముంబాయిలో అర్థరాత్రి వరకు కొనసాగిన సమావేశాలతో సీట్ల పంపకాలపై కాంగ్రెస్​, శివసేన (ఉద్ధవ్​), ఎన్సీపీ (శరద్​ పవార్​) వర్గం ఏకాభిప్రాయానికి వచ్చారు. కాంగ్రెస్​ 105 నుంచి 110 స్థానాల్లో పోటీ చేయనుండగా, శివసేన (యూబిటీ–ఉద్ధవ్​) 90 నుంచి 95 స్థానాల్లో, ఎన్సీపీ (శరద్​) 75 నుంచి 80 స్థానాల్లో పోటీ చేయనున్నారు. అయితే విదర్భ, కొంకణ్​, మరాఠ్వాడా, ఉత్తర, పశ్చిమ మహారాష్ర్టల్లోని పలు స్థానాల్లో కాంగ్రెస్​ తరఫున పోటీ చేయాలనుకున్న అభ్యర్థులకు నిరాశే ఎదురైంది. కాంగ్రెస్​ అధ్యక్షుడు నానా పటోలే కూడా ఆయా స్థానాలలో పేచీ నెలకొందన్నారు. తమ పార్టీ నుంచి గెలిచే అభ్యర్థులు ఉన్నారన్నారు. ప్రస్తుతం ఆయా ప్రాంతాలలోని స్థానాలు సీట్ల సర్దుబాటులో శివసేన (యూబిటీ–ఉద్ధవ్​) వర్గానికి దక్కడంతో స్థానిక కాంగ్రెస్​ పార్టీ శ్రేణులు తీవ్ర నిరాశ నిస్పృహల్లో ఉన్నారు. దీంతో మహా వికాస్​ అఘాడికి నష్టం జరిగే అవకాశం ఎక్కువగా ఉన్నట్లు పార్టీ వర్గాల్లోని పలువురు బహిరంగంగానే ఆవేదన వ్యక్తం చేస్తున్నారు.