ఆశారాంకు సుప్రీం బెయిల్​!

నా తెలంగాణ, న్యూ ఢిల్లీ: అత్యాచారం కేసులో ఆశారాం బాపునకు సుప్రీం కోర్టు బెయిల్​ మంజూరు చేసింది. అనారోగ్య కారణాలతో బాధపడుతున్న ఆయనకు పలు షరతులతో కూడిన బెయిల్​ ను సుప్రీం మంగళవారం మంజూరు చేసింది. మార్చి 31 వరకు మధ్యంతర బెయిల్​ మంజూరైంది. అత్యాచారం కేసులో 2013లో లైంగిక దాడి కేసులో గాంధీనగర్​ దిగువకోర్టు జీవిత ఖైదు విధించింది. అప్పటి నుంచి ఆయన జైలులోనే ఉన్నారు. అనారోగ్య కారణాల వల్ల బెయిల్​ ఇవ్వాలని సుప్రీంలో పిటిషన్​ దాఖలు చేసుకున్నారు. మధ్యంతర బెయిల్​ మంజూరు చేసిన సుప్రీం కోర్టు పలు షరతులను విధించింది. సాక్ష్యాలను తారుమారు చేసే ప్రయత్నాలు చేయవద్దని, సాక్ష్యుల బెదిరింపులు, కలవడం లాంటివి చేయకూడదని స్పష్టం చేసింది. వైద్యపరమైన బెయిల్​ మాత్రమేనని గుర్తుంచుకోవాలంది. శిక్షను సస్పెండ్​ చేయాలన్న పిటిషన్​ ను కోర్టు తోసిపుచ్చింది. ఆశారాం కుమారుడు నారాయణ్​ సాయికి కూడా ఇదే కేసులో 2019 ఏప్రిల్​ లో జీవిత ఖైదు శిక్ష పడింది. ఆశారాంపై 2013లో అహ్మాదాబాద్​ లోని చంద్​ ఖేడా పోలీస్​ స్టేషన్​ లో కేసు నమోదైంది.