ఐపీఎస్ రాజీవ్ రతన్ కన్నుమూత!
విజిలెన్స్ డీజీ, సీనియర్‌ ఐపీఎస్ అధికారి రాజీవ్ రతన్ కన్నుమూశారు.
నా తెలంగాణ, హైదరాబాద్: విజిలెన్స్ డీజీ, సీనియర్‌ ఐపీఎస్ అధికారి రాజీవ్ రతన్ కన్నుమూశారు. మంగళవారం ఉదయం ఆయనకు గుండెపోటు రావడంతో కుటుంబసభ్యులు హుటాహుటిన ఏఐజీ ఆస్పత్రికి తరలించారు. అక్కడ చికిత్స పొందుతూ ఆయన తుదిశ్వాస విడిచారు. రాజీవ్ రతన్ గతంలో కరీంనగర్ ఎస్పీగా కూడా పనిచేశారు. పోలీస్‌ హౌసింగ్‌ కార్పొరేషన్‌ ఛైర్మన్‌గానూ బాధ్యతలు నిర్వర్తించారు.
రాజీవ్ రతన్ 1991 ఐపీఎస్ బ్యాచ్‌కు చెందిన అధికారి. గతేడాది మహేందర్ రెడ్డి డీజీపీగా పదవి విరమణ చేసిన సమయంలో డీజీపీ రేసులో రాజీవ్ రతన్ పేరు ప్రముఖంగా వినిపించింది. ఆ తర్వాత ఆయన విజిలెన్స్ డీజీగా పదోన్నతి పొందారు. కాళేశ్వరం ప్రాజెక్టు అవినీతి ఆరోపణలపై విజిలెన్స్ డీజీ హోదాలో రాజీవ్ రతన్ విచారణ చేశారు. ఆయన సమర్పించిన నివేదిక ఆధారంగా ప్రభుత్వం జ్యుడీషియల్ కమిషన్‌ను ఏర్పాటు చేస్తూ విచారణకు ఆదేశించింది.
సీఎం రేవంత్‌ దిగ్భ్రాంతి
రాజీవ్ రతన్ హఠాన్మరణంపై సీఎం రేవంత్‌రెడ్డి సంతాపం వ్యక్తం చేశారు. ఆయన కుటుంబసభ్యులకు తన ప్రగాఢ సానుభూతి తెలిపారు. సమర్థంగా పనిచేసిన అధికారులను తెలంగాణ సమాజం మరిచిపోదన్నారు.
