టీటీడీ లడ్డూ కల్తీపై నివేదిక కోరిన కేంద్రం

నా తెలంగాణ, న్యూ ఢిల్లీ: తిరుపతి ఆలయ లడ్డూ కల్తీ ఆరోపణలపై కేంద్ర ఆరోగ్య మంత్రిత్వ శాఖ మంత్రి జేపీ నడ్డా సమగ్ర నివేదిక కోరారు. శుక్రవారం లడ్డూ వివాదంపై సీఎం వ్యాఖ్యలు, నివేదికలపై వస్తున్న వార్తలపై స్పందిస్తూ మీడియాతో మాట్లాడారు. ఈ వివాదంపై ఏపీ సీఎం చంద్రబాబును నివేదిక కోరామన్నారు. ఆ రాష్ర్ట ప్రభుత్వం నివేదిక సమర్పించాక కల్తీ విషయంపై సమగ్ర దర్యాప్తునకు ఆదేశిస్తామని తెలిపారు. సీఎం చంద్రబాబుతో ఈ వివాదంపై మాట్లాడానని మంత్రి నడ్డా తెలిపారు. ప్రభుత్వానికి అందిన కల్తీ నివేదికలను కేంద్రంతో పంచుకోవాలని కోరామన్నారు. దీనిపై రాష్​ర్ట రెగ్యులేటర్లతో కూడా మాట్లాడి విచారణ జరుపుతానని తెలిపారు.  ఫుడ్ సేఫ్టీ స్టాండర్డ్స్ ప్రకారం తగిన చర్యలు తీసుకుంటామని జేపీ నడ్డా స్పష్టం చేశారు. ప్రస్తుతానికి తాను నివేదిక కోరానని, దానిని పరిశీలిస్తామని నడ్డా తెలిపారు.