చాయ్ వాలా విధానంపై ఆశ్చర్యం
Surprised at the Chai Wala policy
- యూపీఐ చెల్లింపులు, 24 గంటల బ్యాంకింగ్ సేవలు
- 94 కోట్లకు బ్రాడ్ బ్యాండ్ వినియోగదారులు
- 29 కోట్ల మహిళల జన్ ధన్ ఖాతాలు
- ఫిన్ టెక్ ఫెస్ట్ 2024లో ప్రధాని మోదీ
ముంబాయి: ప్రపంచం భారత్ ఫిన్ టెక్ వైవిధ్యాన్ని చూసి ఆశ్చర్య పోతోందని ప్రధాని నరేంద్ర మోదీ అన్నారు. ఒకప్పుడు చాయ్ వాలా దేశాన్ని సాంకేతికత వైపు నడిపించగలరా? అని ప్రశ్నించారని అన్నారు. కానీ నేడు భారత్ ను సందర్శించేందుకు వచ్చిన వారు ఇక్కడి విధానంపై ఆశ్చర్యపోతున్నారన్నారు. ప్రపంచవ్యాప్తంగా భారత్ యూపీఐ ద్వారా చెల్లింపులను చేయడం, ఆహ్వానించడంలో ముందుందని ప్రధాని తెలిపారు.
శుక్రవారం ముంబాయిలోని జియో వరల్డ్ కన్వెన్షన్ సెంటర్ లో జరిగిన గ్లోబల్ ఫిన్ టెక్ ఫెస్ట్–2024లో ప్రధాని ముఖ్య అతిథిగా పాల్గొని ప్రసంగించారు. భారత్ లో శాస్ర్త, సాంకేతిక, ఆర్థిక శాఖలు బలోపేతం లేవని ఒకప్పుడు అనుకునేవారు. కానీ తమ పదేళ్ల పాలనలో దేశంలో బ్రాడ్ బ్యాండ్ వినియోగదారులు 60 మిలియన్ల నుంచి 940 మిలియన్లకు (94కోట్లు) చేరుకున్నారని తెలిపారు. దేశంలో తీసుకువస్తున్న నూతన విప్లవం వల్ల ఆవిష్కరణలకు ప్రోత్సహిస్తున్నామన్నారు. దీంతో అద్భుతాలు సృష్టించగలుగుతున్నామని మోదీ తెలిపారు.
ప్రస్తుతం బ్యాంకింగ్ సేవలు 24 గంటలపాటు కొనసాగుతున్నాయని వివరించారు. దీంతో బ్యాంకింగ్, ఆర్థిక రంగంలో సమూల మార్పులను తీసుకురాగలిగామన్నారు. ఈ చర్యలతో వ్యాపార, వాణిజ్యాల్లో లావాదేవీల రాకడ, పోకడలు మరింత సులువయ్యాయని పేర్కొన్నారు. జన్ ధన్ ఖాతాలు మహిళా సాధికారతకు నిదర్శనంగా నిలుస్తున్నాయన్నారు. దీని కింద 29 కోట్ల మంది మహిళలు బ్యాంకు ఖాతాలు తెరిచారన్నారు. ఈ ఖాతాలను మరింత బలోపేతం చేయాలనే ఉద్దేశ్యంతోనే ముద్రా యోజనను ప్రారంభించి మహిళలకు పూర్తి ఆర్థిక స్వేచ్ఛను అందజేస్తున్నామన్నారు. వీరు దేశ ఆర్థిక పురోగతిలో కీలక భూమిక పోషించే స్థాయికి ఎదగాలన్నదే తమ అభిమతమని ప్రధాని నరేంద్ర మోదీ తెలిపారు.
