నారీశక్తికి వందనం

నా తెలంగాణ, న్యూ ఢిల్లీ: దేశాభివృద్ధికి వివిధ రంగాలలో కృషి చేస్తున్న నారీశక్తిని ప్రధాని నరేంద్ర మోదీ అభినందనలు తెలిపారు. శనివారం అంతర్జాతీయ మహిళా దినోత్సవం సందర్భంగా మహిళలకు శుభాకాంక్షలు తెలిపారు. సోషల్​ వేదికగా పలువురు మహిళల సేవలను ప్రదర్శిస్తూ కొనియాడారు. కేంద్ర ప్రభుత్వం మహిళలను మరింత శక్తివంతంగా తీర్చిదిద్దే లక్ష్యంతో ముందుకు వెళుతుందన్నారు. తన సోషల్​ ఖాతాలను ఈ రోజున మహిళలే నిర్వహిస్తారని మోదీ ప్రకటించారు. సవాళ్లు, సమస్యలు, విజయాలు, అవరోధాలు, ఆటంకాలను అధిగమిస్తూ మహిళలు మరింత వృద్ధి సాధించాలని ప్రధాని మోదీ ఆకాంక్షించారు. నమోయాప్​ ద్వారా తమ సందేశాలను ప్రపంచానికి చాటిచెప్పాలని పిలుపునిచ్చారు.

కేంద్రమంత్రి జి.కిషన్​ రెడ్డి శుభాకాంక్షలు..
దయ, బలం, స్థితిస్థాపకత వంటి విషయాల్లో అచంచలమైన విశ్వాసాన్ని చాటిచెబుతూ ప్రపంచదేశాల్లో భారతీయ మహిళలు కీర్తిని సాధిస్తున్నారని, మహిళా శక్తిని చాటుతున్నారని తెలంగాణ బీజేపీ అధ్యక్షుడు, కేంద్ర బొగ్గు, గనుల శాఖ మంత్రి జి.కిషన్​ రెడ్డి అన్నారు. అంతర్జాతీయ మహిళా దినోత్సవం సందర్భంగా మహిళలకు శుభాకాంక్షలు తెలిపారు. సమాజాన్ని మార్చే శక్తియుక్తులు స్ర్తీలకే సొంతమన్నారు.  ఎన్నో పాత్రలను ఒంటిచేత్తో పోషిస్తూ దేశాభివృద్ధికి, సమాజాభివృద్ధికి వారు చేస్తున్న సేవలు అద్భుతమైనవని కేంద్రమంత్రి జి.కిషన్​ రెడ్డి కొనియాడారు.