కొమరవెల్లి అంజయ్యకు  జీవన సాఫల్య పురస్కారం

నా తెలంగాణ, హైదరాబాద్​ :  సిద్దిపేటకు చెందిన ప్రముఖ కవి, సీనియర్ జర్నలిస్టు కొమురవెల్లి అంజయ్యను తెలుగు సాహితీ వనం జీవన సాఫల్య పురస్కారం(2024) వరించింది. ఆదివారం హైదరాబాద్ లోని రవీంద్రభారతిలో జరిగిన సంస్థ ఏడవ వార్షికోత్సవంలో అంజయ్య ఈ విశిష్ట పురస్కారాన్ని అందుకున్నారు. గీతాయుధం కవితా సంపుటితో తెలుగు సాహిత్య వనంలో ప్రవేశించిన అంజయ్య నడక బోనం, ఆకులు రాలుతున్నయి కవితా సంపుటాలను వెలువరించారు. నాలుగు దశాబ్దాలుగా పత్రికా విలేకరిగా పనిచేస్తున్నారు. మంజీర రచయితల సంఘం వ్యవస్థాపక సభ్యుడుగా అనేక మంది యువ రచయితలు, కవులను ప్రోత్సహించారు. 1988 నుంచి అంజయ్య ఉమ్మడి రాష్ట్రాల్లోని వివిధ సాహిత్య సంఘాల అవార్డులను పొందారు. రాష్ట్రస్థాయి కవితా పోటీల్లో పాల్గొని విజేతగా నిలిచారు. తెలంగాణ మీడియా అకాడమీ సభ్యుడుగా పనిచేశారు. ఈ కార్యక్రమంలో ప్రముఖ రచయితలు, కవులు ఆడెపు లక్ష్మీపతి, ప్రజాశక్తి ఎడిటర్ సత్యాజి, అంపశయ్య నవీన్, యండమూరి వీరేంద్రనాథ్, ఏనుగు నరసింహరెడ్డి, శాంతి కృష్ణ, సందడి అరుణ, అనురాధ,  నాలేశ్వరం శంకర్, పాతూరి అన్నపూర్ణ, తోట అరుణా నాయుడు, గడ్డం శ్యామల, డాక్టర్ మౌనశ్రీ  మల్లిక్, డాక్టర్ చమన్ సింగ్, బిల్లా శ్రీధర్ రెడ్డి తదితరులు పాల్గొన్నారు.