రెపోరేటు తగ్గింపు మిలియన్​ డాలర్ల ప్రశ్నే?

ఇప్పటికే జీఎస్టీ బొనాంజ అందించిన కేంద్రం
ప్రపంచ వ్యాప్త అనిశ్చితుల్లోనూ భారత్​ బలమైన స్థితిస్థాపకత

నా తెలంగాణ, న్యూఢిల్లీ: ఆర్బీఐ రెపో రేటు 5.5 శాతం నుంచి మారుతుందా? లేదా అనేది మిలియన్​ డాలర్ల ప్రశ్నేనని, తగ్గింపు ఆశలు ఉంటాయా? ఉండవా? అనేది ఆర్బీఐ ఎంపీసీ (ద్రవ్య పరపతి సమావేశం) తరువాత తేలుతుందని ఆర్థిక నిపుణులు తమ అభిప్రాయాలను వ్యక్తం చేశారు. సెప్టెంబర్​ 29 నుంచి అక్టోబర్ 1 వరకు ఆర్బీఐ గవర్నర్​ సంజయ్​ మల్హోత్రా ఆధ్వర్యంలో ఎంపీసీ సమావేశం కానుంది. అనంతరం రెపోరేటును ప్రకటించనుంది. కాగా ఇప్పటికే కేంద్ర ప్రభుత్వం సాహసోపేతమైన నిర్ణయాలను తీసుకుందని, జీఎస్టీ శ్లాబుల నిర్ణయం ఎవ్వరూ ఊహించలేనిదన్నారు. ఏ దేశ ప్రభుత్వాలు ఇంతపెద్ద సాహసాన్ని చరిత్రలో చేసిన ఘటనలు లేవన్నారు. మోదీ ప్రభుత్వం సామాన్యులకు, మధ్యతరగతికే గాకుండా ప్రతీఒక్కరికీ మేలు జరిగేలా ఈ నిర్ణయం ఉందన్నారు. ఈ నేపథ్యంలో రెపోరేటు తగ్గింపుపై ఆర్బీఐ ఏం నిర్ణయిస్తుందో చెప్పడం కష్టమే అన్నారు. ఒకవేళ ఆర్బీఐ రెపోరేటును తగ్గిస్తే ఇది ట్రిపుల్​ బొనంజానే అవుతుందని అభిప్రాయం వ్యక్తం చేశారు. 2025–26 తొలి త్రైమాసికంలో భారత ఆర్థిక వ్యవస్థ బలమైన స్థితిస్థాపకతను ప్రదర్శించిందని, ఐదు త్రైమాసికాల్లోనూ అత్యధిక వృద్ధిని సాధించిందన్నారు. అమెరికా సుంకాలు పెంచడం, ప్రపంచదేశాల్లో యుద్ధ అనిశ్చిత పరిస్థితులు నెలకొనడం, ఇస్లామిక్​ దేశాల ఐక్యత, ఆంగ్లేయ దేశాల కన్నెర్ర, ఈజిప్టు దేశాల డోలాయమానం మధ్య భారత స్థితిస్థాపకత అత్యంత మెరుగ్గా ఉందన్నారు. ఈ నేపథ్యంలో ఇప్పటికే ప్రభుత్వం ద్వారా భారీ లబ్ధి పొందుతున్నందున మరోమారు రెపోరేటు తగ్గింపును ఆశించడం కూడా తప్పే అవుతుందని ఆర్థిక నిపుణులు తమ అభిప్రాయం వ్యక్తం చేశారు.