ధర్మస్థల కేసు.. ఫిర్యాదుదారుడు యూటర్న్​!

ఆరోపలన్నీ అవాస్తవాలని ఒప్పుకున్న చిన్నయ్య
బీఎన్​ఎస్​ సెక్షన్​ 183 కింద వాంగ్మూలం నమోదు

బెంగళూరు: ధర్మస్థల కేసు కీలకమలుపు తీసుకుంది. శనివారం బెల్తంగడిలోని అదనపు కోర్టు ముందు ప్రధాన ఫిర్యాదుదారుడు చిన్నయ్య యూటర్న్​ తీసుకున్నాడు. తాను చేసిన ఆరోపణలన్నీ అవాస్తవాలని ఒప్పుకున్నాడు. ఇందుకు సంబంధించిన మేజిస్ర్టేట్​ నివేదికలు ఆదివారం మీడియాకు లభించడంతో మేజిస్ర్టేట్​ ముందు జరిగిన పరిణామాలు బయటి ప్రపంచానికి వెలుగుచూశాయి. ఇతరుల బలవంతం మేరకే లైంగిక దాడి, హత్య, ఖననం వంటి కల్పిత కథనాలను అల్లినట్లు ఒప్పుకున్నాడు. ఇతని వాంగ్మూలాన్ని భారతీయ శిక్షాస్మృతిలోని సెక్షన్​ 183కింద నమోదు చేశారు. ప్రస్తుతం చిన్నయ్య శివమొగ్గ జైలులో ఉన్నాడు. అత్యంత గోప్యంగా శనివారం ఇతన్ని మేజిస్ర్టేట్​ ముందు హాజరుపరిచారు. విచారణ సందర్భంగా అసత్య ఆరోపణల నేపథ్యంలో సిట్​ అతన్ని అరెస్టు చేస్తున్నట్లు ప్రకటించింది. కాగా చిన్నయ్యను బలవంత పెట్టిందెవరనేది బయటికి రాలేదు. పోలీసులు కోర్టుకు సమర్పించిన నివేదికలోని పేర్లను వెల్లడించలేదు. అయితే చిన్నయ్య గతంలో మానవ పుర్రెను అందించి ఈ ఆరోపణలకు ఊతం కల్పించాడు. ఆ పుర్రెను సౌజన్య మామ విఠల్​ గౌడ తనకు అప్పగించాడని కోర్టులో వెల్లడించాడు. దీంతో సిట్​ దర్యాప్తు మరింత వేగవంతం కానుంది. సాక్షి యూటర్న్​ తీసుకోవడంతో కేసు విశ్వసనీయతకు దెబ్బగా పలువురు అభివర్ణించారు. కాగా ఈ కేసుపై గతంలో సుప్రీంకోర్టును ఆశ్రయించగా.. కోర్టు పిటిషనర్​ కు మొట్టికాయలు వేసి స్థానిక కోర్టును ఆశ్రయించాలని ఆదేశించింది.