గేమింగ్ జోన్ లో అగ్నిప్రమాదం 30కి చేరిన మృతులు
మృతుల్లో 12మంది చిన్నారులు
జైపూర్: గుజరాత్ రాజ్ కోట్ గేమింగ్ జోన్ లో జరిగిన అగ్నిప్రమాదంలో మృతుల సంఖ్య 30కి చేరింది. ఇందులో 12 మంది చిన్నారులు ఉండడం విచారకరం.
శనివారం సాయంత్రం జరిగిన అగ్నిప్రమాదాన్ని రాత్రి 11 గంటల వరకు అధికారులు ఆపగలిగినా అనంతరం రాత్రి గేమింగ్ జోన్ లోని పై కప్పు (షెడ్డూ) పూర్తిగా కుప్పకూలింది. దీంతో రాత్రంతా రెస్క్యూ బృందాలు సహాయక చర్యలను కొనసాగించాయి. ఆదివారం కూడా సహాయక చర్యలు కొనసాగుతున్నాయి. ఈ ప్రమాదంలో 25 మంది సురక్షితంగా బయటపడ్డారు. వీకెండ్ కావడం గేమింగ్ జోన్ 500 టికెట్ ను రూ. 99కే ఇస్తున్నామని ప్రకటించడంతో పెద్ద ఎత్తున సందర్శకులు వచ్చారు.
మరమ్మత్తుల సందర్భంగా వెల్డింగ్ చేస్తుండగా ఆ నిప్పురవ్వలు ఎగిరిపడి మంటలు వ్యాపించినట్లు అగ్నిమాపక శాఖ గుర్తించింది. మంటలు వెంటనే వ్యాపించేందుకు థర్మాకోల్ షీట్లు, రబ్బరు, రెసిన్ లాంటివి కూడా కారణంగా పోలీసులు తేల్చారు. మరోవైపు గేమింగ్ జోన్ లో 2వేల లీటర్ల డీజిల్, 1500 లీటర్ల పెట్రోల్ కూడా నిల్వ ఉంచడంతో మంటలు వాటికి వ్యాపించి ఒక్కసారిగా పెద్ద యెత్తున అగ్నిప్రమాదానికి కారణమైనట్లు గుర్తించారు.
ప్రమాదంపై కలెక్టర్ ఆనంద్ పటేల్ మాట్లాడుతూ.. మృతదేహాలు కాలిపోవడంతో గుర్తించడం కష్టంగా మారిందన్నారు. డీఎన్ ఏ పరీక్షలు నిర్వహించి మృతదేహాలను వారి కుటుంబ సభ్యులకు అప్పగిస్తామని పేర్కొన్నారు. రెస్క్యూ చర్యలు ఇంకా కొనసాగుతున్నాయని మృతుల సంఖ్య పెరిగే అవకాశం ఉందని పేర్కొన్నారు. మరోవైపు ఈ ప్రమాదానికి కారణమైన యాజమాని సోలంకిని, మేనేజర్, మరొకరిని పోలీసులు అదుపులోకి తీసుకున్నారు. మరో ఐదుగురు పరారీలో ఉన్నట్లు పోలీసులు పేర్కొన్నారు.
ఘటనపై పూర్తి విచారణకు గుజరాత్ ప్రభుత్వం సిట్ దర్యాప్తునకు ఆదేశించింది.
