370 మార్చే ప్రసక్తే లేదు
పునరుద్ఘాటించిన కేంద్రమంత్రి జి.కిషన్ రెడ్డి
- ఓట్ల ట్యాంపరింగ్ పై కాంగ్రెస్ పై ఈసీ కన్నెర్ర
- 29మంది హిందువులను గెలిపించుకున్నాం
- సంఘవిద్రోహ శక్తులను ఉపేక్షించం
- జమ్మూలో హస్తానికి ఒక్కటే
- పాక్ కు చైనా సహకారం
- తెలంగాణలో తగ్గిన పాక్ సానుభూతి పరుల సంఖ్య
- మోదీ పాలనలో పదేళ్లలోనే బలమైన భారత్
నా తెలంగాణ, హైదరాబాద్: ఆర్టికల్ 370ని మార్చే ప్రసక్తే లేదని తెలంగాణ రాష్ర్ట బీజేపీ అధ్యక్షుడు, కేంద్ర బొగ్గు, గనుల శాఖ మంత్రి జి.కిషన్ రెడ్డి పునరుద్ఘాటించారు. శుక్రవారం మంత్రి కిషన్ రెడ్డి మీడియాతో మాట్లాడారు. ఆర్టికల్ 370ని ముట్టుకునే సాహసం కాంగ్రెస్ చేయడం లేదన్నారు. హరియాణాలో ఓట్ల ట్యాంపరింగ్ జరిగిందని ఆరోపిస్తున్న కాంగ్రెస్ నేతలు మరి జమ్మూలో ఎందుకు జరగలేదో చెప్పాలని నిలదీశారు. ఈసీ కాంగ్రెస్ ను తీవ్రంగా మందలించిందని మంత్రి చెప్పారు. జమ్మూలో హస్తం పార్టీకి కేవలం ఒక్క సీటు మాత్రమే వచ్చిందన్నారు. కశ్మీర్ లోయలో బీజేపీకి అనుకూలంగా 90 శాతం ఓట్లు పోలైనా మెజార్టీ సీట్లు రాలేదన్నారు. 29 స్థానాల్లో హిందువులను గెలిపించుకోగలిగామని తెలిపారు. స్వాతంత్ర్యం సిద్ధించాక బీజేపీ ఇన్నిసీట్లను ఎప్పుడూ గెలవలేదన్నారు. జమ్మూకశ్మీర్ లో సంఘవిద్రోహ చర్యలను ఉపేక్షించేది లేదని స్పష్టం మంత్రి కిషన్ రెడ్డి హెచ్చరించారు.
నోట్ల రద్దుతో దొంగనోట్లకు చెక్..
జమ్మూకశ్మీర్ లో ప్రస్తుతం ప్రశాంత వాతావరణం కొనసాగుతుందని తెలిపారు. దేశంలో ఉగ్రవాదం, మతకలహాలు తగ్గాయన్నారు. అదే సమయంలో తెలంగాణలోని నిర్మల్, వరంగల్, కామారెడ్డి, నిజామాబాద్ వంటి ప్రాంతాల్లో పాక్ సానుభూతి పరుల సంఖ్య తగ్గిందన్నారు. ఒకప్పుడు తెలంగాణలో ఏదో ఓ చోట మతకలహాలు, ఉగ్రదాడులు జరిగేవని పేర్కొన్నారు. ప్రధాని మోదీ నోట్ల రద్దుతో పాక్ నుంచి వచ్చే దొంగనోట్లకు చెక్ పెట్టగలిగామన్నారు. చైనా పాక్ కు అన్ని రకాల సహకారం అందజేస్తుందని ఆరోపించారు. గతంలో ఆయుధాలు కూడా అందించిన సందర్భాలు అనేకం ఉన్నాయని తెలిపారు. ప్రస్తుతం పాక్ కు యూరప్ దేశాలు కూడా సహకారం ఇవ్వడం లేదని తెలిపారు. ఈ చర్యలు భారత్ సాధించిన అతిపెద్ద విజయంగా తెలిపారు. ప్రధాని మోదీ నేతృత్వంలో బలమైన భారత్ గా పదేళ్లలో నిలిచిందని కేంద్ర మంత్రి కిషన్ రెడ్డి స్పష్టం చేశారు.
అభివృద్ధి పనుల ప్రారంభాలు..
సికింద్రాబాద్ పార్లమెంటరీ నియోజకవర్గంలోని బీద బస్తీ, నల్లగుట్ట, సీతాఫల్ మండిలో శుక్రవారం తెలంగాణ రాష్ర్ట బీజేపీ అధ్యక్షుడు, కేంద్ర బొగ్గు, గనుల శాఖ మంత్రి జి.కిషన్ ఓపెన్ జిమ్ ను ప్రారంభించారు. ఆరోగ్యకరమైన జీవనశైలికి ధృఢమైన ఆరోగ్యానికి కసరత్తు (ఫిట్ నెస్) ఎంతో ముఖ్యమన్నారు. మానవ జీవన శైలిలో ఫిట్ నెస్ ను భాగంగా చేసుకొని పరిపూర్ణ ఆరోగ్యంగా ఉండాలన్న లక్ష్యంతోనే ఫిట్ నెస్ కేంద్రాలను ఏర్పాటు చేస్తున్నట్లు కేంద్రమంత్రి జి.కిషన్ రెడ్డి వివరించారు.
నివాళులు..
భారతరత్న నానాజీ దేశ్‌ముఖ్‌, ప్రజా ఉద్యమ నాయకుడు జైప్రకాశ్ నారాయణ్ జయంతి సందర్భంగా వారికి నివాళులర్పించారు. వారి సేవలను స్మరించుకున్నారు. గ్రామీణ భారత్ వ్యవసాయంపై లోతైన అవగాహన కోసం దేశ్ ముఖ్ చేసిన నిస్వార్థ సేవ ప్రతీ ఒక్కరిలోనూ స్ఫూర్తిని నింపిందన్నారు. ప్రజాస్వామ్యం పట్ల నిబద్ధత, ధైర్యం, భావజాలంతో సంపూర్ణ క్రాంతిని తీసుకువచ్చిన భారతరత్న బిరుదు సాధించిన జై ప్రకాశ్ నారాయణ్ స్ఫూర్తిదాయకంగా నిలుస్తారని కొనియాడారు.
