బలూచ్ లోయలో పడ్డ బస్సు 28మంది దుర్మరణం
22మందికి తీవ్ర గాయాలు టైరు పేలడంతో ప్రమాదం
ఇస్లామాబాద్: పాక్ లోని బలూచ్ లో ఘోర ప్రమాదం జరిగింది. అదుపు తప్పిన బస్సు లోయలో పడిపోవడంతో చిన్నారులు, మహిళలు సహా 28 మంది మృతి చెందారు. పలువురికి తీవ్ర గాయాలయ్యాయి. మృతుల సంఖ్య పెరిగే అవకాశం ఉన్నట్లు అధికారులు పేర్కొన్నారు. క్వెట్టా వాషుక్ నగరంలో బుధవారం ఈ ప్రమాదం చోటు చేసుకుంది. అతివేగంగా ప్రయాణిస్తున్న బస్సు టైరు పగిలిపోవడంతో అదుపు తప్పి లోయలో పడింది. బస్సులో 50 మంది వరకు ప్రయాణిస్తున్నట్లు అధికారులు తెలిపారు. ప్రమాదం జరిగిన వెంటనే స్థానికులు పోలీసులకు సమాచారం అందించి సహాయక చర్యలు చేపట్టారు. పాక్ లో ఇరుకైన రహదారులు, అత్యధిక ప్రయాణికులు, వాహనాల్లో సరైన భద్రతా ప్రమాణాలు పాటించకపోవడంతో పలు ప్రమాదాలకు కారణమవుతున్నట్లు అధికారులు తెలిపారు. గాయపడ్డ వారిని బసిమా సివిల్ ఆసుపత్రిలో చికిత్సనందిస్తున్నారు.
